Frábær hugmynd ...

Þetta er frábær hugmynd, ef henni verður þá fylgt eftir af alvöru. Mikið vildi ég að bæjarstjórinn í Kópavogi og hans fylgifiskar lesi þessa frétt og taki upp eftir Reykvíkingum að hlusta á íbúana, hafa við þá samráð í meiri- og minniháttar málum í stað þess að vera stöðugt í þessum stríðslátum í kringum alla skapaða hluti. Nægir þar að nefna deilur um Lund, Kársnes, Nónhæð, Vatnsenda, Glaðheima og svona mætti lengi telja.

Aukið samráð við íbúa borgarinnar

Frábær flutningur á Verkamanni Steins og Bergþóru

Á minningartónleikum um Bergþóru Árnadóttur í Salnum fyrir skömmu flutti trúbadorinn Jónas Sig ljóð Steins Steinarrs um Verkamanninn við lag Bergþóru. Útsetning lagsins var vægast sagt frumleg, gítar og túba.  Magnaður flutningur.  Upptöka af laginu hefur nú verið sett inná YouTube, ekki í sérstökum gæðum en gefur engu að síður góða hugmynd um flutninginn.

Höfðingi fallinn frá

Fallinn er frá mikill höfðingi, Árni Helgason í Stykkishólmi. Ég var svo lánsöm að kynnast Árna þegar ég tók að mér að vera leiðbeinandi við Grunnskólann í Stykkishólmi veturna 1989-1991. Þar var ég jafnframt fréttaritari DV á staðnum og eftir að ég hafði sent eina frétt suður um ólæti á dansleik bauð Árni mér í kaffi heim til sín. Þar tóku hann og Ingibjörg kona hans á móti mér með miklum virktum, nýbökuðum pönnukökum og heitu kaffi. Árni talaði við mig af miklum kærleik og af föðurlegri umhyggju og sagði: „Ingibjörg mín, við flytjum ekki slæmar fréttir héðan úr Hólminum.“

Meira á www.ingibjorg.net

Árni Helgason látinn

Ráðherrann kíkti í kaffi og vínarbrauð

Mikið er ég ánægð að Kristján Möller hafi kíkt í kaffi hjá bæjarstjóranum í Kópavogi í morgun. Vesalings bæjarstjórinn var búinn að bíða eftir ráðherranum í 9 mánuði, hámandi í sig vínarbrauð og rúnnstykki. Var farinn að leiðast biðin og leið eins og hryggbrotinni mær.

Mikið er gott að samgönguráðherrann miskunaði sig yfir ljósmyndafyrirsætu ársins og bjargaði bæjarstjóranum frá því að borða allt bakkelsi morgunsins sjálfur. Eitthvað ræddu þessir fyrrum starfsfélagar af Alþingi samgöngumál milli þess sem þeir mauluðu vínarbrauð. Það getur þó ekki hafa tekið langan tíma fyrir bæjarstjórann að útlista fyrir ráðherranum hvar skóinn kreppir í Kópavogi, enda býr ráðherrann í því sveitarfélagi á meðan þing starfar. Ég vona að fundur þeirra hafi verið árangursríkur Kópavogsbúum til heilla og framdráttar.

Við vitum a.m.k. hvar Gunnar er!

Einhver spaugsamur leigupenni bæjarstjórans í Kópavogi skrifaði grein í Morgunblaðið í dag í nafni bæjarstjórans og ákallar þar samgönguráðherrann Kristján L. Möller. Í greininni segir frá því að bæjarstjórinn hafi boðið samgönguráðherra í heimsókn og er farinn að lengja eftir honum. Bæjarstjóranum datt því í hug að auglýsa eftir honum í Mogganum. Það lesa jú allir málsmetandi Moggann, ekki satt? 

Í greininni segir að Gunnar sitji á bæjarstkrifstofunum og bíði og bíði ... eins og hann bíði eftir Godot ... en hann lætur sér ekki leiðast á meðan hann bíður. Hann er ljósmyndafyrirsæta ársins 2007 og biðin sl. 9 mánuði hefur mótað útlit mannsins

Ég vona sannarlega að samgönguráðherra kíki í heimsókn á bæjarskrifstofurnar, við vitum að þar bíður bæjarstjórinn og hámar í sig rúnnstykki og vínarbrauð. Það er síðan spurning hvort nokkuð verði eftir af veitingunum þegar Kristján mætir á svæðið.

Formennska í fjórum nefndum

Á fundi stjórnar KSÍ skipti stjórnin með sér verkum. Þar var mér falin formenska í fjórum nefndum: 

• Framkvæmdanefnd NMU16 á Íslandi 2008
• Fræðslunefnd
• Unglinganefnd kvenna og
• Útbreiðslunefnd

Vitaskuld er ég bæði upp með mér og montin af því að vera falið að fara fyrir þessum mikilvægu nefndum. Allar nefndirnar snúa að grasrótinni, grunni öflugrar og kraftmikillar knattspyrnuiðkunar um land allt. Með mér í nefndunum er mikið af öflugu fólki sem öll eiga það sameiginlegt að eiga sér hugsjón um sterka íslenska knattspyrnu.

Að auki á ég sæti í Framkvæmdanefnd um jafnréttisáætlun.

www.mbl.is sá ástæðu til þess í dag að fjalla um þessa verkaskiptingu stjórnar og setti sem fyrirsögn að Jón tæki við formennsku í landsliðsnefnd karla. Ég viðurkenni það fúslega að ég skil ekki alveg fréttamat þeirra Moggamanna en virði það þó við þá að þeir taka það sérstaklega fram að um sé að ræða landsliðsnefnd KARLA.  Alltof oft hefur það brunnið við að menn tala um landsliðsnefnd annars vegar og landsliðsnefnd kvenna hins vegar.

Þetta hljómar sjálfsagt dálítið sjálfhverft, en mér finnst það ekki sérstakt fréttaefni að Jón Gunnlaugsson taki við formennsku í landsliðsnefnd karla, að Þórarinn Gunnarsson haldi áfram um stjórnartaumana í dómaranefnd nú eða að Lúðvík S. Georgsson fari fyrir mótanefnd. Það sem mbl.is mönnum láðist að segja frá er að þarna er um að ræða nefndir sem Halldór B. Jónsson fór fyrir en hann gaf ekki kost á sér til áframhaldandi setu í stjórn KSÍ á síðasta ársþingi sökum veikinda.

Ánægð með niðurstöðuna

Eurovision lauk í kvöld, ég sá ekki laugardagslögin en miðað við fréttir þá virðis Eurobandið hafa unnið. Ég er ánægð með það. Ekki þar fyrir að ég hélt að Hey hey hey myndi vinna, enda grípandi og hressilegt lag. Ég var að horfa á þáttinn í kvöld og flutningurinn á lagi Barða var að mínu viti ekki góður. Reyndar gæti ég sagt að flutningurinn aðal söngvarans hafi verið skelfilegur, en ég ætla ekki að gera það. Eurobandið flutti sitt lag fumlaust og örugglega og það fleytti hópnum áfram til Serbíu. Þar munu þau örugglega verða landi og þjóð til sóma en ég er þó langt frá því viss um að lagið muni fleyta okkur í úrslitakeppnina eins og Hey hey hey hefði gert. Við þurfum að hafa guð og lukkuna með okkur í undankeppninni, ef svo verður getur allt gerst.

Aldarafmæli skáldsins

Á vafri mínu um veraldarvefinn fór ég inná vef þar sem uppáhalds skáldi mínu Steini Steinarri eru gerð skil. Þar las ég af áfergju allmargar færslur um þetta mikla skáld og sá ég á fyrstu færslu um skáldið að í ár eru 100 ár liðin frá fæðingu hans. Af því tilefni held ég að það sé ekki úr vegi að birta hér eitt af þeim þremur ljóðum sem ég setti sjálf á blað og nefndi Tilbrigði við Stein.

Tilbrigði við Stein II 

Á meðan ég stóð
og horfði út
yfir dimmblátt vatnið
flaug tíminn framhjá.

Og í vatninu synti
fagurgrænn fiskur
og hann sagði
við mig.

Hirtu ekki um þau
tíminn og vatnið
eru eilíf
en ekki við.

Ljóð þetta fékk ég birt í Lesbók Morgunblaðsins fyrir margt löngu.

Fyndnasta frétt gærdagsins!

Þetta er náttúrulega bara ótrúlega fyndin frétt.

 

Af hverju er Ólafur ekki með í könnuninni?

Fylgiskönnun borgarstjóraefnis sjálfstæðismanna kemur ekki á óvart. Þó ég skilji ekki af hverju menn eru að láta gera könnun um það hvern fólk styðji í stól borgarstjóra ef það fær aðeins að velja á milli sjálfstæðismanna. Það er Deginum ljósara í þessari könnun að Reykvíkingar vilja alls ekki að sjálfstæðismenn sitji í borgarstjórastólnum yfirleitt. En fyrst könnunin var sett upp á þennan veg má einnig spyrja sig að því af hverju ekki var líka boðið uppá Ólaf F. Magnússon sem kost í stöðunni. Hann hefur nú verið innvígður og innlimaður í Sjálfstæðisflokkinn alveg uppá nýtt og hefði því verið verðugur fulltrúi meðal hinna sjálfstæðismannanna.

Fylgi Samfylkingarinnar í borginni kemur ekki á óvart, en ég verð að viðurkenna að ég skil ekki hvers vegna fylgistap Sjálfstæðisflokkisins er ekki miklu, miklu meira!

Flestir vilja Hönnu Birnu sem borgarstjóra