Nú hverfur sól í haf

Herra Sigurbjörn Einarsson biskup er látinn. Það kemur kannski einhverjum á óvart að ég skuli setjast niður við tölvuna og rita hugleiðingar um mann sem ég átti engin persónuleg samskipti við. Engu að síður vil ég minnast þessa mæta mans í nokkrum orðum því þó hann hafi ekki vitað af því þá hafði hann nokkur áhrif á uppeldi mitt.

Þannig er að þegar ég var ung stúlka að alast upp í Kópavoginum þá fór ég ævinlega á gamlársdag með föðurforeldrum mínum í messu í Hallgrímskirkju kl. 18. Þar sat ég sperrt við hlið Guðnýjar ömmu minnar og Lárusar afa míns og fylgdist með predikunum sem oftast voru fluttar af sr. Ragnari Fjalari Lárussyni en einnig kom fyrir að hr. Sigurbjörn Einarsson biskup predikaði. Ef hr. Sigurbjörn var ekki að messa þá sat hann alltaf nærri okkur, mjög framarlega í kirkjunni. Alltaf hlutstaði ég af athygli á messuorðin og söng svo hástöfum með, sérstaklega þegar sálmurinn „Ég kveiki á kertum mínum" eftir sr. Hallgrím Pétursson var fluttur.

Að messu lokinni var presturinn kvaddur með þökk fyrir messugjörðina en þá fóru amma mín og afi alltaf til hr. Sigurbjörns og frú Magneu og þökkuðu þeim líka fyrir og óskuðu þeim gleðilegs nýs árs. Það gerði ég líka og ég man alltaf hvað mér fannst vera mikil og djúp virðing yfir þeim hjónum báðum og mikil blíða sem umkringdi þau.

Þegar ég las um andlát hr. Sigurbjörns þá vöknaði mér um augu, ég fékk kökk í hálsinn og ég gerði mér grein fyrir því að án beinna afskipta af mér eða mínum þá hafði hann áhrif á mitt uppeldi og mína kristilegu hugsun. Fyrir það er ég honum ævarandi þakklát og er einhvernvegin sannfærð um að víða í íslensku þjóðfélagi megi finna fólk sem bera þessar sömu tilfinningar í brjósti.

Ættingjum og vinum hr. Sigurbjörns Einarssonar færi ég samúðarkveðjur og þökk fyrir samfylgd þessa mikla manns.

Rás 1 flutti einstaklega vel viðeigandi lag á andlátsdegi hr. Sigurbjörns Einarssonar, ljóðið heitir Nú hverfur sól í haf og er eftir hann sjálfan en lagið eftir son hans Þorkel Sigurbjörnsson tónskáld. Sjaldan eða aldrei hefur lagaval verið jafnvel viðeigandi og þarna og hitta þeir þó oft naglann á höfuðið á Rás 1.

Nú hverfur sól í haf
og húmið kemur skjótt.
Ég lofa góðan Guð,
sem gefur dag og nótt,
minn vökudag
minn draum og nótt.

Þú vakir, faðir vor,
og verndar börnin þín,
svo víð sem veröld er
og vonarstjarna skín,
ein stjarna hljóð á himni skín.

Lát daga nú í nótt
af nýrri von og ttrú
í myrkri hels og harms
og hvar sem gleymist þú
á jörð, sem átt og elskar þú.

Kom, nótt, með náð og frið,
kom nær, minn faðir hár,
og leggðu lyfstein þinn
við lífsins mein og sár,
allt mannsins böl,
hvert brot og sár.

(Sigurbjörn Einarsson)

Orða eða ekki orða, þar er efinn

Í dag bárust af því fréttir að forseti vor hyggðist sæma leikmenn íslenska landsliðsins Riddarakrossi hinnar íslensku fálkaorðu fyrir framgöngu sína á handboltavellinum í Kína. Er það vel og hugmyndin sjálfsagt vel meint. En það berast einnig fréttir af því að forsetinn ætli að sæma fyrirliðann, þjálfarann og formann HSÍ stórriddarakrossi fyrir framgönguna. Gott og vel. Sem dugandi þjóðfélagsþegn og liðsmaður innan íþróttahreyfingarinnar þá set ég dálítið spurningamerki við þessi ósköp öll.

Í fyrsta lagi minnir mig að forsetinn hafi ætlað að draga úr því prjáli sem fylgir orðuveitingum þegar hann bauð sig fyrst fram til forseta. Sjálfsagt eru allir búnir að gleyma því og kannski ég líka, en á annarri öxl minni situr púki sem hvíslar þessu stöðugt í eyra mér.

Í öðru lagi velti ég því fyrir mér af hverju þrír úr hópnum eigi að fá stórriddarakross á meðan aðrir fá riddarakross. Jú fyrirliðinn er búinn að fá riddarakrossinn svo það á sér skýringar. En hvað með þjálfarann og formanninn. Af hverju stökkva þeir beint í stórriddarann?

Í þriðja lagi þá spyr ég, af hverju fær ekki allur hópurinn orðu? Var ekki um það talað á meðan á leikunum stóð að hópurinn ALLUR væri þéttur, samstilltur og óhugnanlega samstíga í öllu sínu! Í hópnum eru nefninlega líka nokkrir "fótgönguliðar" sem eru ekki að falla í kramið hjá forsetanum. Það er ég viss um að aðstoðarmenn þjálfarans hafa ekki sofið mikið meira en hann á meðan á leikunum eða undirbúningi þeirra stóð. Það sama á við um hjúkrunarliðið sem nuddaði, plástraði og læknaði drengina í gríð og erg á meðan á leikunum stóð.

Á myndinni hér að neðan má sjá hópinn sem stóð að baki þessum ótrúlega glæsilega árangri. Þarna er framkvæmdastjórinn, sjúkraþjálfarinn, nuddarinn, læknirinn, aðstoðarþjálfarinn og aðstoðarmaðurinn. Þessir fimm verða eftir þegar forsetinn afhendir krossana. 

Hvað sem verður þá óska ég þeim sem hljóta vegtyllur forsetans innilega til hamingju.

Silfur í Beijing

Til hamingju Ísland með þetta frábæra handknattleikslandslið. Strákarnir hafa staðið sig eins og sannkallaðar hetjur og þeir hafa lyft íslensku þjóðlífi uppá æðri stall með frammistöðu sinni. Umfjöllun um þá er kærkomin tilbreyting frá bullinu í borgarstjórn og víðar.

Það var ekki laust við að tár trítluðu niður vangann á mér í morgun þegar ég sá strákana taka við silfrinu. Þá rifjaðist upp stundin fyrir átta árum þegar Vala Flosadóttir steig á pall í Sidney og tók við bronsinu. Ég var á staðnum og var hreinlega að rifna úr stolti yfir stelpunni og hennar frábæra afreki. Svo fékk ég fréttir að heiman að menn hefðu flaggað, flautað og gert allt vitlaust þegar Vala náði þessum frábæra árangri. Ég minnist þess ekki að hafa brynnt músum í Sidney yfir afrekinu enda sleppti ég mér alveg á áhorfendapöllunum eins og sjá má á myndbrotinu hér til hliðar.

Stórasta land í heimi

Til hamingju strákar, Til hamingju Ísland, Til hamingju allir!!!

 Orð dagsins á forsetafrúin: „Ísland er ekki litla landið, Ísland er stórasta land í heimi!"

Ekkert fundað í leikskólanefnd

Í dag bárust fréttir af mikilli manneklu í leikskólum Kópavogsbæjar. Þegar hefur verið farið fram á það við formann og varaformann leikskólanefndar að nefndin verði kölluð saman hið fyrsta. Er enda kominn tíma til þar sem liðnar eru 11 vikur frá því nefndin fundaði síðast. Því miður eru ekki miklar líkur á að fundur verði boðaður þar sem formaður nefndarinnar er staddur í Kína og varaformaðurinn hefur ekki látið svo lítið að svara ítrekuðum tölvupóstum þar um.

Á leikskólaskrifstofu bæjarins er verið að vinna að því hörðum höndum að leysa vandann og það ber að virða. En á meðan er leikskólanefnd föst í sumarfríi, börnin komast ekki í leikskólann sinn og foreldrar þeirra ekki til vinnu. Finnst þér þetta boðlegt?

Viðurkenningar umhverfisráðs

Umhverfisráð Kópavogs hefur veitt viðurkenningar fyrir fallega garða, snyrtilegt umhverfi og endurbætur á eldra húsnæði. Tvennt í viðurkenningunum vekur athygli mína. Annars vegar viðurkenning sem íbúar Hólmaþings 10 hlutu vegna glæsilegs frágangs húss og lóðar á nýbygginarsvæði en þau hlaut gamall nágranni minn og vinur af Álfhólsveginum, Ólafur Sigtryggsson og hans kona. Undanfarin misseri hef ég fylgst vandlega með uppbyggingu húss þeirra í Hólmaþingi og verð að segja að niðurstaðan er hreint frábær. Óska ég þeim, sem og öðrum viðurkenningarhöfum innilega til hamingju með heiðurinn.

Hitt sem vakti athygli mína er sú niðurstaða umhverfisráðs að veita viðurkenningu fyrir hönnun íþróttamannvirkis, sem er stúkan við Kópavogsvöll. Ég er svo sem ekki að setja út á það að verðlauna þetta glæsilega mannvirki, en ég minnist þess ekki að umhverfisráð hafi áður veitt viðurkenningu fyrir hönnun íþróttamannvirkis. Auk þess sé ég það fyrir mér þegar afhendingin fór fram þar sem bæjarstjóri afhentir formanni bæjarráðs viðurkenninguna en auk þess að vera formaður bæjarráðs er sá hinn sami vallarstjóri Kópavogsvallar og undirmaður Gunnars í stjórnkerfi bæjarins. Alveg sé ég þá fyrir mér félagana fallast í faðma og knúsa hvorn annan með formann umhverfisráðs á milli sín. Svo sætt !!!

Viðurkenningar umhverfisráðs fyrir árið 2008 eru:

Gata ársins - Ísalind 1–8
Framlag til umhverfismála - JB Byggingafélag, opið svæði við Grandahvarf
Frágangur húss og lóðar á nýbyggingarsvæði - Hólmaþing 10
Hönnun fjölbýlishúss - Tröllakór 12–16
Hönnun íþróttamannvirkis - Stúkan við Kópavogsvöll
Endurgerð húsnæðis - Fífuhvammur 39

... og aðeins betur ef það er það sem þarf!!!

Frábært, stórkostlegt, magnað, ótrúlegt, hrikalegt og öll hin lýsingaroðin eiga við leikinn í morgun!

Áfram Ísland!

Arnór Atlason

Björgvin Páll Gústafsson

Forsetinn og forsetinn, Ólafur R og Ólafur R!

Guðjón Valur Sigurðsson

Ólafur Stefánsson

Danskir dagar

Um helgina skrapp ég vestur í Stykkishólm og tók þátt í dönskum dögum. Talsverðar fréttir hafa verið frá hátíðinni og flestar þeirra hafa verið neikvæðar. Er það miður, því mín upplifun af hátíðinni er sú að þar hafi flest farið vel fram og skv. því sem ég átti von á.

Það verður þó ekki framhjá því litið að nokkur unglingadrykkja var á svæðinu, heldur meiri en hún hefur verið þau tvö skipti sem ég hef áður sótt hátíðina. Ástæðan er bæði sú sem framkvæmdastjóri hátíðarinnar benti á, þ.e. að hátíðin væri ekki um sömu helgi og menningarnótt, og hitt að skólar hefjast nú fyrr en þeir gerðu þegar ég sótti hátíðina síðast heim og e.t.v. voru unglingarnir að nota þessa síðustu helgi fyrir vetrarannir til að skvetta úr klaufunum.

Mér þótti ákaflega miður að verða vitni að þessari unglingadrykkju, en þó verður að segjast eins og er að hinir fullorðnu voru ekki endilega betri en unglingarnir hvað það varðar. Það breytti þó ekki því að ég skemmti mér vel, bæði á föstudag og laugardag og var stórglæsileg flugeldasýningin frá Súgandisey hátindur hátíðahaldanna.

Það er virkilega skemmtilegt að fylgjast með því hvað sveitarfélög um land allt leggja mikinn metnað í hátíðir sem þessa. Reyndar væri það fróðlegt að taka það saman hvaða sveitarfélög efna til bæjarhátíða yfir sumartímann. Þær eru örugglega fleiri en maður heldur.

Hólmurum þakka ég fyrir helgina og hlýjar móttökur.

Frábærir Íslendingar

Þeir voru aldeilis frábærir leikmenn íslenska landsliðsins í handbolta í dag. Leikurinn gegn Þjóðverjum var stórkostleg skemmtun og kom mér algjörlega í opna skjöldu. Það hefur því miður oft verið þannig að eftir góðan leik, eins og gegn Rússum á dögunum, þá kemur slakur leikur. Sem betur fer var slíkt ekki uppi á teningnum í dag og sýndu strákarnir sannkallaða meistaratakta.

Til hamingju Ísland!

Að gefnu tilefni

vil ég taka fram að ég er ekki yfirlæknir á heyrnar- og talmeinastöðinni eins og Fréttablaðið heldur fram í dag. Því starfi sinnir alnafna mín Ingibjörg Hinriksdóttir, háls-, nef- og eyrnalæknir.