Fótbolti, fótbolti, fótbolti

Næsta vika verður eintómur fótbolti hjá mér. Stúlknalandsliðið, skipað leikmönnum 16 ára og yngri, tekur þá þátt í Norðurlandamótinu sem verður haldið hér á landi 30. júní til 6. júlí. Tveir riðlar eru í mótinu og mun annar riðillinn vera leikinn á Suðurlandi en hinn á Suðurnesjum.

Íslenska liðið verður staðsett á Hótel Örk í Hveragerði en aðrar þjóðir sem eru með þeim í riðli verða á Hótel Selfossi. Leikið verður á Selfossi í Þorlákshöfn og á Hvolsvelli. Þeir sem leið eiga um svæðið eru hvattir til að kíkja þá leiki sem í boði eru.

• Leikir í A-riðli (á Suðurlandi, íslenska liðið)
• Leikir í B-riðli (Suðurnes)

Lífið er fótbolti!

Góð helgi - stórkostlegt veður

Mikið óskaplega var helgin góð. Fyrst unnu íslensku stelpurnar þær slóvensku 5-0 og færðu þar með móður minni góða afmælisgjöf. Pabbi hefur haldið um fjarstýringuna á sjónvarpinu frá því þær voru fundnar upp og tekst einhvernvegin alltaf að finna fótbolta (enda með áskrift að yfir 100 stöðvum). Ég held að mamma hafi í upphafi ekki haft neinn sérstakan áhuga á fótbolta en hún kann reglurnar vel og þekkir stöku leikmenn. Hún hafði gaman að leiknum hjá stelpunum á laugardaginn og vill endilega koma með mér á völlinn á fimmtudag, ég held ég láti það eftir henni!

Sunnudagurinn var ekki verri, mín var risin úr rekkju uppúr kl. 9 og við tók þramm með systur minni í Versalalaug, 30 mínútna hressandi ganga og svo bara dekur og leti í lauginni þegar þangað var komið. Þar sem veðrið lék við okkur ákváðum við systur (ein til viðbótar hafði bæst við í lauginni) að fjölmenna í Guðmundarlund og grilla okkur eitthvað létt í hádeginu. Þetta létta lét ekki á sér standa og endaði í þrumugóðum kolagrilluðum hamborgara ... mmmmmmm!

Enn hélt veðrið áfram að hafa áhrif á ákvarðanir dagsins og við þrammsystur skunduðum (ókum) á Valbjarnarvöll og sáum seinni hálfleik á leik Þróttar og ÍR. Ég er ekki frá því að ég hafi séð Ægi bloggvini mínum bregða fyrir í Laugardalnum! Eftir að hafa setið smá stund í kulda og trekki við stúkuna færðum við okkur um set og settumst í hallann við norðurenda vallarins og létum þar sólina baka okkur til leiksloka og ögn lengur.

Þegar heim var komið var síðan hitað upp fyrir leik Spánverja og Ítala, þar sem mínir menn unnu í vítaspyrnukeppni og öllum á óvörum reyndist Iker Cassias vera meiri vítabani en Buffon hinn hárprúði ítalski markvörður. Ég fagnaði því vitaskuld enda er það mín spá að Spánverjar nái loks að landa stórum titli.

Ps. verð eiginlega að bæta við að á landsleiknum á laugardag hitti ég einn af „10 bestu“ knattspyrnumönnum Íslands í leikhléi, við spáðum í leiki helgarinnar á EM og ég spáði Rússum og Spánverjum sigri ... knattspyrnumaðurinn var algjörlega á öndverðum meiði en þegar ég lét mig ekki sagði hann. „Þú hefur nú ekkert vit á fótbolta.“ - Þá vitum við það!

Áfram Ísland - alla leið!

Góðir Íslendingar,

laugardaginn 21. júní nk. stendur íslenska kvennalandsliðið í knattspyrnu frammi fyrir einni af þeim þrautum sem fyrir liðið er lagt á leið þess í úrslitakeppni EM sem fram fer í Finnlandi sumarið 2009. Íslensku stelpurnar hafa sett markið hátt og hafa frá því þessi undankeppni hófst ekki legið á þeirri skoðun sinni að þær ætli sér í úrslitakeppnina, fyrst íslenskra A-landsliða í knattspyrnu.

Síðasta sumar var sett glæsilegt aðsóknarmet þegar Serbar komu í heimsókn í Laugardalinn. Nú er komið að því að slá það met þegar Slóvenar mæta í dalinn á laugardag kl. 14:00. Stúkurnar á Laugardalsvelli taka 9.800 manns í sæti. Þau sæti þurfum við að fylla ef við ætlum okkur að ná því takmarki sem stelpurnar og við öll höfum sett okkur. Þinnar nærveru er ekki aðeins óskað hennar er krafist. Ekki láta þitt eftir liggja, taktu þátt í að láta íslenska drauminn rætast. Mættu á völlinn og stattu með stelpunum okkar á vegferð þeirra til Finnlands 2009.

Áfram Ísland - allir með!

Dýrið gengur laust

Breiðablik-FH 4:1

Lognið á undan storminum

Ætli nú sé lognið á undan storminum. Andleysið hefur verið að ganga frá mér þessa dagana, kannski fór svona mikið í jazz tónleikana um daginn? Kannski er það bara málið að ég nenni ekki að sitja við tölvuna á kvöldin þegar veðrið er svona gott. Ég er búin að fara í nokkra hressandi göngutúra síðustu kvöld og dregið að mér fullt af fersku og góðu súrefni. Frábært.

Annars viðurkenni ég að ég horfi dálítið á fótbolta þessa dagana, bæði í sjónvarpinu á EM og hér heima á knattspyrnuvöllum landsins. Ekki amalegt það. Kosturinn við það að fara á völlinn og sjá íslenskt knattspyrnufólk reyna með sér (móti því að sitja í sófanum og horfa á bestu knattspyrnumenn Evrópu) er að þar hittir maður mann og annan og getur átt vitrænt spjall.

Ekki það að mér finnist samskiptin hér á blogginu eitthvað þurr, þvert á móti, en þegar ég á þess kost þá kýs ég helst að eiga samskipti við fólk augliti til auglitis frekar en á lyklaborðinu. Þó það geti verið mjög gott svona inn á milli.

En til að gleðja bloggvini mína þá ætla ég að færa ykkur dásamlega uppskrift að sumarlegu kjúklingasalati á grænmetis beði sem ég eldaði fyrir vinnufélaga mína í dag. Ægir, það væri gaman að sjá mynd af þessari framreiðslu hjá þér svona sem mótvægi við saltkjötið í vetur!

Ummmm ... virkilega gott.

Kjúklingasalat Hrefnu

• ½ bolli olía
• ¼ bolli balsamik edik
• 2 msk. sykur
• 2 msk. soyjasósa

sjóða saman í ca. 1 mínútu, kæla og hræra í á meðan það kólnar. Þessu er dreift yfir salatið þegar það er tilbúið til framreiðslu.

• 1 pk. af instant súpunúðlum með kryddi
• 1 pk. möndluflögur eða heslihnetuflögur
• Sesamfræ

Rista saman á pönnu í olíu, það tekur lengstan tímann að brúna núðlurnar, svo hneturnar og sesamfræin þurfa bara stuttan tíma. (Ég setti líka furuhnetur í þennan pakka, mjög gott)

• 4 kjúklingabringur
• 1 fl. Sweet Hot Chilisósa

bringurnar eru skornar í strimla og snöggsteiktar í olíu, sweet hot chilisósu og látið malla í smá stund. Þegar kjúklingurinn er steiktur á hann það til að blotna mikið (þ.e. það rennur úr honum vökvi), ég valdi það að hella soðinu af áður en ég setti Sweet Hot Chili sósuna á pönnuna

• 1 pk. Rukólasalat blanda
• Nýir íslenskir tómatar í sneiðum
• 1 mangó í teningum
• 1 rauðlaukur sneiddur

Salatið er sett á fat og núðlublandan yfir og kjúklingastrimlunum raðað yfir.

Borið fram með snittubrauði.

Bestu tónleikar EVER!

Fór á bestu tónleika sem ég hef hlýtt á EVER í kvöld. Geggjaðir djass tónleikar í Salnum í boði Bjössa Thor og vina hans!  Aldrei, ADLDREI hef ég notið tónleika í botn eins og þessa. Hápunkturinn var að Andrea Gylfa og SUMMERTIME ... þvílík snilld, þvílíkur flutningur.

Ég grét fögrum tárum að flutningi loknum, þetta var GEGGJAÐ! (ég þoli ekki hástafi), en þetta var GEGGGGGGGGGJAÐ!   Þakka Bjössa Thor og félögum fyrir magnaða tónleika, vona að þeir hafi verið teknir upp!   FIMM broskallar ... það gerist ekki betra! STÓRKOSTLEGT! Lifi Bjössi Thor og félagar ... ummmmmmmmmm!!!!!!!

Æran hans Geira

Eftirfarandi grein birtist á baksíðu Fréttablaðsins í morgun. Mér fannst hún orða í hnotskurn skoðun mína á umræddum dómi yfir Geira í Goldfinger og leyfi mér að birta hana hér að höfundi hennar forspurðum. Greinina skrifaði Bergsteinn Sigurðsson.

Æran hans Geira
Héraðsdómur Reykjavíkur skar úr um í vikunni að umfjöllun tímaritsins Ísafoldar um Geira á Goldfinger hefði vegið að æru hans. Ekki hefðu verið færðar sönnur á ásakanir um að á Goldfinger færi fram mansal og vændi. Geiri fékk milljón til að jafna sig.

Auðvitað er það sjálfsögð krafa að færð séu sterk rök fyrir ávirðingum á borð við þær sem bornar voru á Geira í Ísafold. Hafi það ekki verið gert á dómstóll að dæma ummælin dauð og ómerk. Mér er hins vegar fyrirmunað að skilja hvernig í ósköpunum héraðsdómi tókst að komast að þeirri niðurstöðu að æra Geira beðið slíka hnekki að það kosti ekki undir milljón að rétta hana við. Ef orðspor Geira væri alþjóðlegur gjaldmiðill væri það íslenska krónan: verðlaust, til trafala og of hátt skráð.

Það er nefnilega þannig að um nokkurt skeið hefur Geiri unnið ötullega að því að skapa sér ímynd ógeðfellds nektarbúllueigenda með óhreint mjöl í pokahorninu sem vílar fátt fyrir sér til að ná sínu fram. Tveggja ára gamlar fréttir af handtöku Geira, eftir að hann ruddist inn á Bóhem við fimmta mann og hélt þar fólki nauðugu, benda til að þessi ímynd sé ekki fullkomlega innistæðulaus. Hvort sem ásakanir Ísafoldar eru sannar eða ekki, eru þær í fullu samræmi við þann orðstír sem Geiri á Goldfinger hefur leynt og ljóst getið sér.

Ekki er útskýrt í dómnum hvað liggur að baki upphæðinni sem Geira var dæmd, hvernig tjón hans var metið. Mögulega töldu dómararnir að ásakanirnar hefðu kostað Geira viðskipti. Eflaust væri það gild röksemd ef Geiri væri eigandi Heklu eða Kaffitárs. En Geiri selur ekki bíla eða kaffi heldur hefur atvinnu af því að höfða til lægstu hvata mannsins. Eitthvað segir mér að fastagestunum á Goldfinger þyki brigslyrði um vændi og mansal engin sérstök fyrirstaða fyrir því að venja komur sínar þangað.

Dómurinn er líka enn eitt dæmið um snarhækkandi miskabætur í meiðyrðamálum, meðan bætur til þolenda kynferðisbrota standa í stað. Það er eins og dómarar hafi einhvern tímann orðið ásáttir um að þolendur kynferðisbrota skyldi bættur skaðinn með andvirði notaðs fellihýsis og við það sitji. Nú er hins vegar lag fyrir réttarkerfið að koma skikk á skaðabótamatið með því að búa til sérstakan gullfót, eða réttara sagt gullfingur; fastan ærustuðul Geira á Goldfinger sem allar miskabætur tækju mið af. Í nauðgunarmálum þyrfti bara að slá tuttugu prósent af.

Undarleg deila um heimildarmynd

Síðustu daga hef ég ekki getað horft á mikið á sjónvarp eða hlustað á útvarpsfréttir. Það er eiginlega tilviljun að fréttatímar hafa farið framhjá mér og ég hef ekki lagt mig niður við það að hlusta eða horfa á fréttir á netinu. Nú undir kvöld þegar ég settist við tölvuna fyrir háttinn þá sé ég frétt á visir.is þar sem segir í fyrirsögn „Dettur ekki í hug að biðja Þórhall afsökunar“. Fyrirsögnin vakti athygli mína og ekki minnkaði forvitnin við að lesa innganginn að fréttinni.

Í stuttu máli snýst fréttin um að dagskrárstjóri RÚV, Þórhallur Gunnarsson, hafi ekki viljað sýna heimildarmynd Árna Snævarrs um Evrópusambandið. Í framhaldi af því hafi Árni bloggað um það á vefnum og leitt að því líkum að Þórhallur hafi ekki viljað sýna myndina af ótta við viðbrögð frá Sjálfstæðisflokknum. Í framhaldinu telur Þórhallur að Árni skuldi honum afsökunarbeiðni enda segist aldrei muni láta stjórnmálaflokk hafa áhrif á sín störf.

Gott og vel, ég ætla ekki að blanda mér í þessa deilu, en ég get ekki annað en harmað það að RÚV skuli ekki hafa séð sér fært að sýna þessa mynd. Hvort sem Þórhalli eða Sjálfstæðisflokknum líkar það betur eða verr þá er hugsanleg aðild að Evrópusambandinu á dagskrá og það á að ræða þann möguleika að Ísland sæki þar um aðild. Umræðan ein og sér um Evrópusambandið er ekki umsókn. Ég skil ekki þann ótta sem menn hafa við umræðuna og ég er klárlega ekki ein um þá skoðun því skoðanakannanir hafa sýnt að meirihluti Íslendinga vill skoða möguleikann á aðild. Í þættinum sem hægt er að horfa á á vefsíðu visir.is segir danskur þingmaður að Íslendingar hafi komið sér upp einskonar ljósritunarlýðræði því við tökum upp reglurnar frá Brussel og ljósritum þær yfir á íslenska stjórnskipun.

Er þá ekki betra að skoða möguleikann á aðild af fullri alvöru, vera þar í skini og skúrum heldur en að vera í skugga Evrópusambandsins alla tíð og reyna að bera inn ljósið með hattinum okkar eins og Bakkabræður forðum!

Slóðin að heimildarmyndinni: http://www.visir.is/article/20080603/FRETTIR01/792782120