Aðalfundur knattspyrnudeildar Breiðabliks

Aðalfundur knattspyrnudeildar Breiðabliks var haldinn í gærkvöldi. Á dagskrá voru venjuleg aðalfundarstörf og að þessu sinni voru umræður um stöðu deildarinnar fjörugar og margir tóku til máls. Það þykir mér gott. Félagar í Breiðabliki hafa til þessa verið heldur tregir til að tjá sig á fundum og hafa jafnvel mætt illa, fundurinn í gær boðar breytta og betri tíma í því sambandi.

Formaður deildarinnar fór yfir starf sl. árs og nefndi það sérstaklega að við þyrftum að gera betur hvað varðar aðsókn að leikjum. Ég tek undir það. Það verður þó ekki framhjá því litið að sl. sumar var einstaklega skemmtilegt og þó stundum hafi mér þótt mátt vera betri mæting þá fannst mér mætingin á völlinn almennt góð og stemmingin var engu lík.

Þegar aðalfundir eru haldnir þykir mér nauðsynlegt að fundarmenn fái tvö plögg í hendur. Annars vegar er það skýrsla stjórnar fyrir sl. starfsár og hins vegar yfirlit yfir reikninga. Í gærkvöldi fengum við reikningana í hendur en ekki skýrslu stjórnar ... annað árið í röð. Ég tók til máls undir liðnum skýrsla stjórnar og reikningar og minntist sérstaklega á þetta. Því miður greip formaður deildarinnar til þess ráð að svara mér með skætingi og pirringi. Hann sagði að skýrsla stjórnar væri í ársriti deildarinnar og að það rit hafi verið borið út í allan bæinn.

Ég viðurkenni það fúslega að þessi framkoma formannsins stuðaði mig verulega, ég varð bæði sár og reið enda hafði ég ekki til þess unnið í minni ræðu að vera svarað með slíkum skætingi. En verra þótti mér þó að ég var ekki sú eina á fundinum sem formaðurinn talaði niður til að mínu mati. Það urðu fleiri fyrir barðinu á honum og þykir mér það miður. Persónulega er ég með breitt bak og hef tekið á mig ýmsa brotsjói í gegnum tíðina, það er allt í lagi, en mér finnst verra þegar fólk sem hefur unnið gríðarmikið og óeigingjarnt starf í þágu deildarinnar þarf að sitja undir þeim ávirðngum sem fuku á fundinum. Svo ekki sé minnst á þá sem ekki eru félagar í Breiðabliki.

Breiðablik er, hefur verið og verður áfram mitt félag og ég læt ekki einn formann, sem situr um stundarsakir, pirra mig að eilífu þó hann hafi verið með dónaskap og leiðindi á einum fundi. Mér þykir einfaldlega of vænt um félagið sjálft og Blika til að svo geti nokkru sinni orðið.

Stjórn knattspyrnudeildar var endurkjörin á fundinum í gærkvöldi en þó með einni breytingu. Árni Bragason hætti í stjórn en í hans stað var kjörinn Árni Páll Árnason. Um leið og ég þakka Árna Bragasyni fyrir hans vel unnu störf vona ég og veit reyndar að Árni Páll verði félaginu drjúgur á komandi árum.

Formaður knattspyrnudeildar Breiðabliks heitir Einar Kristján Jónsson.

Góðir tónleikar um gott tónskáld

Hér var ég búin að skrifa langa færslu um tónleikana. En fyrir einhvern andsk. klaufaskap missti ég allt út. Styttri útgáfan er þessi, tónleikarnir voru góðir, ég hef heyrt Lífsbókina og Að liðnu vori miklu betur flutt en í gær en Magga Stína og Jónas Sigurðsson voru stórkostleg. Hljómsveitin var mögnuð og aðrir söngvarar stóðu sig af mikilli prýði. Lei Low mætti ekki af óviðráðanlegum orsökum!

Takk fyrir mig.

Bergþóra Árnadóttir að flytja Lífsbókina betur en nokkur annar.

Bergþóru Árnadóttur minnst

Fylgiskönnun Plússins

Var að lesa frétt inná www.dv.is þar sem fram kemur að „Sjálfstæðisflokkurinn nýtur minna fylgis en nokkru sinni áður, eða 22 prósenta, samkvæmt nýrri skoðanakönnun Plússins. Hins vegar segjast um 42 prósent styðja Samfylkinguna. Um 14 prósent styðja Vinstri græna. Aðrir flokkar fá minna fylgi.

Samkvæmt niðurstöðum könnunarinnar treystir einungis fimmti hver kjósandi samanlagt Ólafi F. Magnússyni og Vilhjálmi Þ. Vilhjálmssyni til að gegna embætti borgarstjóra. Níu prósent segjast treysta Vilhjálmi best til að verða borgarstjóra. Núverandi borgarstjóri, Ólafur F. Magnússon, nýtur ellefu prósenta fylgis. Dagur B. Eggertsson, oddviti Samfylkingarinnar og fyrrverandi borgarstjóri, hlýtur aftur á móti stuðning 79 prósenta aðspurðra. Könnunin var gerð eftir Kastljósþáttinn fræga þar sem Vilhjálmur vísaði til þess að hann hefði ráðfært sig við borgarlögmann vegna umboðs síns í REI-málinu svokallaða.

Alls tóku rúmlega 4000 manns þátt í skoðanakönnuninni og voru þeir búsettir víðsvegar um landið. Taka verður mið af því að 72 prósent þátttakenda í könnuninni eru konur. Þá er einungis fimmtungur svarenda yfir fimmtugu.“

Þessi könnun verður að teljast marktækari en könnun Heims um daginn þar sem aðeins nokkur hundruð svöruðu.  Fyrirvarinn sem settur er aftast í könnunina bendir hins vegar til að sá sem skrifar fréttina vilji draga úr vægi hennar og tiltekur því kynjahlutfall og aldursbil þeirra sem svöruðu. Má þá draga þá ályktun að ungar konur styðji Samfylkinguna meira en aðra flokka og sé í sama mæli ekki eins hallar undir Sjálfstæðifslokkinn?

 

Hann er alltaf svo málefnalegur

Tilvitnunin í Gunnar í fréttinni er stórskemmtileg og sýnir hvað hann er alltaf málefnalegur:

„Það segir Samfylkingin en við tökum ekki mark á því, þeir eru á móti öllum skipulagsmálum hér og hafa alltaf verið. Við kippum okkur ekkert upp við það og höldum okkar striki,"  

Hann sagði líka á umræddum bæjarstjórnarfundi að það væri ekki að marka Samfylkinguna af því að bæjarfulltrúar hennar hefðu ekki til þess neina menntun. Það er gott fyrir kjósendur Gunnars og stuðningsmenn að vita að hans mati skiptir menntun öllu máli þegar kemur að ákvarðanatöku.  Bæjarfulltrúar Samfylkingarinnar í Kópavogi, rétt eins og Kópavogsbúar almennt, eru ákaflega vel menntaðir og skynsamt fólk með víðtæka reynslu. Bæjarfulltrúar Samfylkingarinnar eru fullfærir um að taka skynsama ákvörðun í skipulagsmálum Kópavogsbæjar. Það eru ekki bæjarfulltrúar Samfylkingarinnar sem hafa verið í endalausum deilum við íbúa bæjarins vegna skipulagsmála, um það hefur meirihluti bæjarstjórnar undir forystu Gunnars Birgissonar og Ómars Stefánssonar séð.

Það er ljóst, af deilum undanfarinna ára um skipulagsmál í Kópavogi, að það er ekki aðeins Samfylkingin sem Gunnar Birgisson tekur ekki mark á, hann tekur heldur ekki mark á íbúum bæjarins og skoðunum þeirra, enda hafa þeir sjálfsagt ekki til þess menntun að hans mati.

Gunnar Birgisson: „Höldum okkar striki"

Er í lagi að Mogginn segi ósatt?

Eftirfarandi grein eftir Dag B. Eggertsson birtist á Vísi.is í dag.

Morgunblaðið sagði vísvitandi ósatt í leiðara eftir nýjustu meirihlutaskiptin í borgarstjórn og hélt því fram að ég hefði krafið Ólaf F. Magnússon borgarstjóra um vottorð. Þetta hefur ítrekað verið borið til baka af Gunnari Eydal skrifstofustjóra borgarstjórnar og síðast Ólafi F. Magnússyni sjálfum. En aldrei hefur Morgunblaðið leiðrétt rangfærslu sína. Hvað þá beðið hlutaðeigandi afsökunar.

Í Staksteinum í dag gerir Morgunblaðið Samfylkinguna ábyrga fyrir kaupréttarsamningum REI sem samþykktir voru í stjórn REI – og hvergi annars staðar - þar sem enginn Samfylkingarmaður átti sæti. Morgunblaðið segir vísvitandi ósatt um þetta.

Morgunblaðið veit líka að minnihluti stjórnar Orkuveitunnar og meðeigendur Reykvíkinga voru leyndir því af Vilhjálmi Þ. Vilhjálmssyni og forystu Sjálfstæðisflokksins að "þjónustusamningur" sem lagður var fram á stjórnarfundi OR í REI-málinu á ensku var ranglega kynntur og var í raun 20 ára einkaréttarsamningur á nafni, þekkingu og starfskröftum Orkuveitunnar.

Um ábyrgð Sjálfstæðisflokksins á þessu vitna fréttir og leiðara Morgunblaðsins síðustu daga. Staksteinar kjósa engu að síður að gera framgöngu fulltrúa Samfylkingarinnar á stjórnarfundinum tortryggilega. Af hverju biður Morgunblaðið ekki allt eins fulltrúa Akraness sem var jafngróflega blekktur og aðrir í þessu máli að segja af sér?

Morgunblaðið hefur mér að vitandi aldrei haldið því fram að það sé í lagi að stjórnmálamenn segi ósatt heldur þvert á móti að þeir þurfi að axla ábyrgð ef þeir eru staðnir að því. Hvernig má það vera að Morgunblaðið segi ítrekað ósatt, birti ekki leiðréttingar eða afsökunarbeiðni og að enginn, hvorki ábyrgðarmaður né eigendur geri sig líklega til að axla ábyrgð á því?

Er Morgunblaðið svo djúpt sokkið að það skeytir ekki lengur um skömm eða heiður? Lenti Morgunblaðið ef til vill bara í þessu? Eða er jafnilla komið fyrir Morgunblaðinu og Sjálfstæðisflokknum í Reykjavík að það hafi ekki styrk til að taka á sínum innri vandamálum og kjósi því frekar að afneita þeim og reyna að beina sjónum almennings annað?
Höfundur er oddviti Samfylkingarinnar í Reykjavík.

Ótrúlegar teikningar á borði bæjarskipulags!

Guðríður Arnardóttir, oddviti Samfylkingarinnar í Kópavogi, hefur ritað ítarlega færslu á bloggi sínu um hreint ótrúlegar teikningar sem nú liggja á borði bæjarskipulags Kópavogsbæjar. Í þeim teikningum er allt að því ómanneskjuleg þétting byggðar í nágrenni Smáralindar sem gerir ráð fyrir áttfaldri Reykjanesbraut (fjórar akreinar í hvora átt) auk tveggja hliðarreina sitt hvoru megin við brautina, alls 12 akreinar.

Kópavogsbúum og reyndar öllum þeim sem eiga erindi í Smáralind og næsta nágrenni er fullljóst að nú þegar er gatnakerfið þar um kring sprungið. Vegabætur eru vissulega í farvatninu en það á líka við um annað. Turninn við Smáratorg fer að komast í gagnið og þá mun umferð aukast til mikilla muna. Þeir sem hafa lagt leið sína í World Class í Laugum gera sér væntanlega fulla grein fyrir þeirri umferð sem fylgir þeirri starfsemi og þó World Class í Turninum sé ekki nærri því eins stór og í Laugum þá mun sú starfsemi hafa talsverð áhrif á umferð. Líkamsræktin er þó aðeins á einni hæð af 20 í Turninum.

En hér er ekki öll sagan sögð. Í byggingu er nú 15 hæða turn norðan Smáralindar, í Lindum IV er verið að byggja tvö stór verslunar- og skrifstofurými, þegar hefur verið samþykkt að byggja 13 hæða turn við Bæjarlind og atvinnuhúsnæði við Dalveg 32. Þessar byggingar eru samtals ríflega 90.000 fermetrar.

Til viðbótar þessu, sem þegar er samþykkt, er ljóst að á teikniborði bæjarstjórans eru skipulagsbreytingar á Glaðheimasvæðinu sem gera ráð fyrir tæplega 200.000 fermetra verslunar- og þjónustusvæði og sunnan Smáralindar er gert ráð fyrir 140.000 fermetra húsnæði í sama tilgangi. Samtals er því verið að tala um rúmlega 430.000 fermetra af verslunar- og þjónusturými á svæðinu. Grófa skilgreiningu af svæðinu má sjá á myndinni hér til hliðar, ef þú smellir á myndina þá stækkar hún.

Þetta mál varðar alla íbúa höfuðborgarsvæðisins. Þetta getur ekki verið einkamál bæjarstjórans í Kópavogi og fylgisveina hans í meirihlutanum. Meirihlutinn ætlar sér að lauma þessu skipulagi í gegn í bútasaumi, setja einn turn inn í einu. Á bæjarskipulagi Kópavogs er búið að gera líkan sem ég hef heyrt að líti út eins og Huston í Texas sem mun vera einhver ómanneskjulegasta borg í heimi. Þar er ekki gert ráð fyrir því að gangandi vegfarandi fari nokkursstaðar um. Þetta er kannski framtíðarsýn Ómars Stefánssonar um borgina sem hann langar svo til að búa í. Ég veit það ekki en þetta er a.m.k. ekki sá Kópavogur sem ég vil byggja.

 

Hvað kostar svona björgun?

Er ekki rétt að láta fólk sem leggur á lokaðar heiðar greiða fyrir þann kostnað sem björgunarsveitirnar verða fyrir? Heiðin var jú lokuð, væntanlega hefur það ekki farið framhjá fólkinu og björgunarsveitarmenn sem hafa staðið í ströngu undanfarna sólarhringa þurftu að gera sér ferð um miðja nótt langt uppá heiði til að bjarga þeim.

Lögðu á lokaða Holtavörðuheiði

Ársþing KSÍ

Ársþing KSÍ var haldið í dag. Þingin eru vart svipur hjá sjón frá því sem áður var, í dag hófst þingið kl. 11:00, 30 mínútna hlé var gert um hádegisbil og var þinginu slitið skömmu fyrir kl. 15:00. Ég man eftir þingum sem voru í þrjá daga, hófust á föstudagseftirmiðdegi, voru allan laugardaginn og lauk um miðjan dag á sunnudegi. Þá tókust menn á um málefni og það var þjarkað um alla mögulega og ómögulega hluti. Í dag kom einn upp vegna ársreikninga, einn undir skýrslu stjórnar og einn undir liðnum önnur mál.

Það má þó segja að þingin séu orðin markvissari og málefnalegri en þau voru, þingfulltrúar eru að mörgu leyti betur undirbúnir en áður og ákvarðanir er varða knattspyrnuna á Íslandi eru teknar jafnt og þétt yfir allt árið. Það er gott.

Kosið var til nýrrar stjórnar, ég var í framboði og hlaut náð fyrir augum þingfulltrúa til tveggja ára setu til viðbótar. Fyrir það er ég bæði þakklát og stolt en nú er það ljóst að ég mun sitja í stjórn KSÍ í átta ár í það minnsta en ég var fyrst kosin í stjórn árið 2002.

Stjórn KSÍ kosin á ársþingi í janúar 2008.

9 Smáraturnar til viðbótar - 12 akreina Reykjanesbraut!

Á mánudagsfundi Samfylkingarinnar í Kópavogi 11. febrúar verða aðallega tvö mál á dagskrá. Fyrst verður farið yfir tröllvaxnar hugmyndir um uppbyggingu í Smáranum, Lindunum, Glaðheimasvæðinu og við Dalveg. Þær fela m.a. í sér allt að 9 háhýsi sambærileg við Smáratorgsturninn sem nú er risinn eða hærri, 12 akreina Reykjanesbraut og stórskert lífsgæði þúsunda íbúa í Smáranum, Lindunum og í suðurhlíðum Kópavogs.  Bæjarfulltrúar og fulltrúar flokksins í skipulagsnefnd fara yfir málið.

Einnig verður rætt um stefnumörkun í íþrótta- og tómstundamálum í Kópavogi og munu fulltrúar flokksins í íþrótta- og tómstundaráði hafa framsögu.

Fundurinn er í Hamraborg 11, 3. hæð og hefst kl. 20:30. Hann er opinn félögum og öðrum áhugasömum Kópavogsbúum.

Norðmaður í Kópavogi

Ég var að lesa frétt inná Vísir.is og fannst einhvernvegin að ég yrði að koma henni á framfæri hér.

Norðmaður einn er í vondum málum eftir að eiginkona hans fékk kreditkortareikninginn sinn. Maðurinn hafði farið í ferðalag til Íslands og eytt tveimur kvöldum á nektardansstað. Hann borgaði fyrir herlegheitin með kreditkorti en virðist ekki hafa áttað sig á því að um kreditkort eiginkonunnar var að ræða. Frá þessu er sagt á danska vefmiðlinum avisen.dk.

Þegar konan sá vísa-reikninginn sinn brá henni heldur í brún þegar hún uppgötvaði að um fimmtíuþúsund krónur höfðu verið settar á kortið á nektardansstað á Íslandi. Grunur hennar beindist strax að eiginmanninum sem hafði verið á Íslandi á sama tíma.

Málsvörn mannsins var á þá leið að hefði ekki eytt svona miklum peningum á staðnum, heldur í mesta lagi um þúsund krónum. Hann klagaði málið því til norska bankaeftirlitsins sem fór í málið. Það hefur því sljákkað eitthvað í karli þegar í ljós kom að hann hafði sjálfur kvittað fyrir öllum færslunum sem settar voru á kortið umrædd kvöld.

Í framhaldi af þessu er ekki úr vegi að velta því fyrir sér af hverju ekki hefur verið hægt að taka afstöðu til ferðaþjónustu innan Kópavogsbæjar. Málið hefur nokkrum sinnum verið tekið upp í Atvinnu- og upplýsinganefnd bæjarins en ekki komist áleiðis.

Í eftirtöldum fundargerðum nefndarinnar er rætt um ferðaþjónustu í bænum:

• Fundur 6. febrúar 2007
• Fundur 7. maí 2007
• Fundur 14. maí 2007
• Fundur 18. júní 2007 (hér er ferðaþjónusta eina mál fundarins)
• Fundur 19. nóvember 2007

Á fundinum 19. nóvember var samþykkt að gera úttekt á tekjum og umfangi ferðaþjónustu í Kópavogi. Það verður spennandi að fylgjast með því hvort þeir sem vinna það verkefni fái upplýsingar frá öllum þeim sem sinna „ferðaþjónustu“ í bænum!

ps. verð að bæta þessu við:

Þjáður af skemmtunarskorti
skrapaði norsari tott.
En að borga með konunnar korti
var kannski ekki nógu gott.

Höfundur