Fésbók

Undanfarna daga hefur mikið verið fjallað um Fésbókina (Facebook). Atriðið í áramótaskaupinu var bráðfyndið og kannski eins og sumir upplifa Fésbókina. Fyrir nokkrum mánuðum datt ég inn í þetta og hef nú sankað að mér fullt af fólki sem ég þekkti hér einu sinni eða hitti á einhverjum tímapunkti í lífi mínu. Í gær fann ég t.d. frændfólk mitt í Ástralíu sem ég sá síðast fyrir nokkrum árum. 

Um helgina fann ég líka minningarsíðu um vinkonu mína sem lést á sviplegan hátt árið 1988 en sonur hennar stofnaði minningarsíðu um móður sína á Fésbók. Hann var aðeins 7 ára, held ég, þegar móðir hans lést og því tel ég að Fésbók geti verið honum mikilvægur upplýsingamiðill til þess að kynnast móður sinni betur í gegnum gamla vini hennar og skólafélaga. Þessar upplýsingar hefði verið óhugsandi fyrir hann að safna saman fyrir örfáum árum, en ég sé að í dag hafa margir gamlir skólafélagar og vinir móður hans haft samband og vonandi verður það til þess að hann fái ljósari mynd af móður sinni í framhaldinu.

Hitt er svo annað að sumar þær upplýsingar sem birtar eru á Fésbók eiga takmarkað erindi þangað, einnig eru ýmiskonar leikir og skoðanakannanir tengdar inná bókina og í fyrir ekki löngu síðan heyrðust fréttir af því að tölvuvírusar smituðust með ýmsum skrám á Fésbók. Það er miður en mín niðurstaða er engu að síður sú að Fésbók sé mikilvæg viðbót við þá möguleika sem veraldarvefurinn býður uppá og ég tek bókinni fagnandi.

Athugasemdir

[Helga Kristjánsdóttir, 11.1.2009 kl. 21:08]

Já,mér gengur betur með það heldur en mail-ið,kanski er eitthvað  að þar hjá mér,get ekki sent neitt,ekkert þurrkað út. Æ mér er sama í hvaða Keflavíkinni ég ræ. Nú verð ég að hvíla því 3gja daga prófyfirseta (veikindapróf)er framundan.  kveðja.

[Ingibjörg Hinriksdóttir, 11.1.2009 kl. 21:10]

Gangi þér vel Helga mín.

[Kristján Þór Gunnarsson, 12.1.2009 kl. 10:59]

Athyglisvert framtak að stofna minningarsíðu á andlitbókinni. Facebook er hinsvegar mikil gróðrastía fyrir vírus og nauðsynlegt að fara varlega