Tveggja vikna afslöppun á Íslandi

Undanfarnar tvær vikur hef ég unað mér við leik en engin störf og hef notið hverrar mínútu til hins ítrasta. Veðrið á Íslandi hefur verið algjörlega magnað og ég var svo heppin að eyða dögunum frá 27. júlí - 1. ágúst við Úlfljótsvatn þar sem hitinn var á köflum hreint óbærilegur. Algjörlega magnaðir dagar engu að síður þar sem afslöppunin var engu lík.

Reyndar hóf ég ferðalag mitt föstudaginn 25. júlí þegar ég brá mér vestur á Snæfellsnes með Veiðifélaginu. Þar var ég í tvær nætur ásamt fríðu föruneyti. Tilgangur ferðarinnar var að veiða nokkrar bröndur úr vötnunum við Vatnaleiðina en sökum veðurs þá létu bröndurnar ekki ná sér. Ferðin á nesið var hins vegar æðisleg og eyddi ég megninu af sunnudeginum í siglingu um Breiðafjörð með Eyjaferðum. Það er algjörlega óborganlegt að sigla um Breiðafjörðinn þegar veðrið leikur svona við mann, spegilsléttur sjór og hitinn eins og hann gerist bestur.

Að aflokinni ferð á Snæfellsnes lá leið mín austur að Úlfljótsvatni þar sem foreldrar mínir höfðu sumarbústað á leigu í eina viku. Þau komu í bústaðinn á föstudag ásamt Bubbu systur minni en þar sem hún varð þeirrar gæfu aðnjótandi að verða amma þá um helgina þá eyddi hún ekki þeim tíma þar sem hún hafði ætlað. Eins og hún orðaði það sjálf: „Það er kjánalegt að eyða helginni í bústað en sofa heima hjá sér!" Hinni hennar Bubbu eignaðist nefnilega yndislegan son þann 26. júlí og var Bubba að sjálfsögðu ekki fjarri þegar sá atburður átti sér stað. Óska ég henni, Hinna og Ástu innilega til hamingju með litla yndislega prinsinn.

Það var ljúft að eyða þessari viku með foreldrum mínum í bústaðnum, þangað komu systkini mín og þeirra fjölskyldur og var gestagangur og margmenni í bústaðnum. Nóg pláss var fyrir alla og menn nutu veðurblíðunnar í botn. Á það ekki síst við um fimmtudaginn 30. júlí þegar hitamet var slegið í næsta nágrenni við Úlfljótsvatn, á Þingvöllum en opinberir mælar þar fóru í 29,7 gráður. Hitinn á bústaðnum okkar sló yfir 30 gráðurnar og var allt að því óbærilegt að vera þar. Hið góða við þennan mikla hita var þó engu að síður að flugan, sem öllu jöfnu hefur sig talsvert í frammi við Úlfljótsvatn, virtist ekki hafa kjark eða þor til að ergja okkur í þessum hita og vorum við ákaflega sátt við það.

Myndir úr ferðunum mínum og af litla prinsinum munu birtast á flickr síðunni minni nú um helgina. Óska ég lesendum síðunnar farsællar og slysalausrar Verslunarmannahelgar.

Fyrir hvern vinna sveitarstjórnir?

„Vandamálið við skipulagsmál er tvennskonar. Í fyrsta lagi þá gagnast þau oftast þeim sem ekki þurfa að búa við þau, bæjaryfirvöldum miklu frekar en bæjarbúum. Sveitarstjórnir hafa spillst og taka orðið meira mark á hagsmunum verktaka og fyrirtækja heldur en íbúa. Skipulagsmál hafa því í framhaldinu orðið að bitbeini þessara tveggja hagsmunaaðila.

Í öðru lagi hafa skipuleggjendur trúað því að þau geti breytt hegðun fjöldans með því að breyta félagslegu umhverfi þeirra. Þetta getur hafa átt við þegar götulýsingu var komið á, garðbekkir voru settir niður eða þegar pípulagnir voru lagðar í hús eða götur. Þessi hugsun byggir á því að breyta samfélaginu þannig að það passi í aðstæðurnar í stað þess að breyta aðstæðum þannig að þær passi samfélaginu."

Ian Bertham, breskur skipulagsfræðingur

Merkilegar umhverfisskýrslur vegna Kársness

Með tillögum meirihluta bæjarstjórnar Kópavogs um nýtt skipulag á Kársnesi fylgja tvær umhverfisskýrslur, sem unnar eru af fyrirtækinu Mannviti. Bera þær heitin: Kársnes-hafnarsvæði-endurbótasvæði annars vegar og Umhverfisskýrsla, Kársnes-Vesturhluti. Skýrslurnar eru ágætlega unnar og vel læsilegar en við lestur þeirra vakna engu að síður margar spurningar og reyndar fleiri spurningar en þær svara.

Í annarri skýrslunni segir m.a.: „Áður en tillagan fer til auglýsingar verður leitað umsagnar Umhverfisstofnunar, Vegagerðarinnar, Siglingastofnunar og Heilbrigðiseftirlits Hafnarfjarðar- og Kópavogssvæðis auk annarra viðeigandi umsagnar- og hagsmunaaðila. Auk þess verður sveitarfélögum innan svæðisins kynnt breytingin.“ Þetta er nokkuð merkilegt, ekki síst í ljósi þess að á fundi bæjarstjórnar upplýsti formaður bæjarráðs að það yrði að auglýsa tillögurnar og samþykkja þær í auglýsingu áður en fundur yrði haldinn í Svæðisskipulagi höfuðborgarsvæðisins í byrjun ágúst!

• Bíddu við átti ekki að kynna tillögurnar áður en þær færu í auglýsingu?

Einnig segir í skýrslunum að það séu meginmarkmið Kópavogsbæjar í umferðarmálum er að öryggi allra vegfarenda verði aukið og dregið úr óþægindum af bílaumferð. Auk þess sé stefnt að því að þjónustustig aðalgatnakerfis lækki ekki.

• Má líta svo á að aukning bílaumferðar á eina götu um 5.000 bíla, þannig að hún geti þjónað 18-20 þúsund bílum á sólarhring muni ekki draga úr þjónustustigi þeirrar götu?

Það má hverjum sjálfstætt hugsandi manni vera ljóst að umferðaraukning uppá 5.000 bíla á sólarhring mun auka hættu á umferðarslysum á því svæði þar sem aukningin er. Á það er bent í skýrslunni en þar segir: „Með staðbundum mótvægisaðgerðum má draga úr aukningu á slysahættu eða jafnvel auka umferðaröryggi á tilteknum stöðum.“ [feitletrun mín].

• Það er nefnilega það. Það má draga úr aukningu eða jafnvel auka umferðaröryggi. Mikil ósköp, má með þessu orðalagi ætla að brunnurinn verði ekki birgður fyrr en barnið er dottið ofan í hann?

Einn punktur í skýrslunni er með slíkum ólíkindum að jafnvel verkfræðistofan sem samdi skýrsluna treystir sér ekki til að standa við heldur vísar til þess að Kópavogsbær telji að „umfang fyrirhugaðra skipulagsbreytinga ekki þess eðlis að það kalli á sértæka vöktunaráætlun.“

• Með öðrum orðum, skýrsluhöfundar þora ekki að taka undir mat bæjaryfirvalda heldur vísa einungis til þeirrar skoðunar þeirra að ekki þurfi að sértæka vöktunaráætlun. Enda svo sem ekki nema von þegar umferðaraukningin er aðeins 70-100% frá því sem nú er!

Virðingarleysi við íbúa Kársness

Ég las í blaði á þriðjudag að mig minnir grein frá formann sjálfstæðisfélags í Kópavogi þar sem hann varði með kjafti og klóm það skipulag á Kársnesi sem nú hefur verið sent til auglýsingar. Um er að ræða skipulag sem íbúasamtök á Kársnesi hafa með formlegum og óformlegum hætti, í ræðu og riti, mótmælt og hafa ekki getað sætt sig við. Er þar fyrst og fremst um að ræða mótmæli vegna gríðarlegrar umferðaraukningar sem óneitanlega fylgja svo mikilli aukningu á íbúðum og íbúum vestast á Kársnesi.

Í réttlætisskrifum formannsins segir m.a.: „Það er ekki íbúum Kársness til hagsbóta að ata þeim út í stríð við bæjaryfirvöld á röngum forsendum.“ Þarna ratast honum rétt orð í munn. Það er engin ástæða til að ata íbúum út í stríð við bæjaryfirvöld á röngum forsendum ... eða réttum. Meirihluti bæjarstjórnar Kópavogs hefur, með réttu eða röngu, verið í stríði við íbúa Kársness frá því að fyrstu tillögur litu dagsins ljós í desember 2006. Meirihluti bæjarstjórnar segir að haft hafi verið samráð við íbúasamtökin, en við það samráð kannast íbúasamtökin ekki. http://karsnes.is/?p=272

Fjölmenni mætti á fund bæjarstjórnar Kópavogs sem fulltrúar Samfylkingarinnar í bæjarstjórn óskuðu eftir. Með viðveru sinni á fundinum vildu íbúar Kársness ítreka þá skoðun sína að þeir væru ekki sáttir við að senda skipulagið í auglýsingu, m.a. vegna þess að auglýsingin fer fram á sumarleyfistíma þar sem ekki allir hafa aðstöðu til þess að hafa í frammi mótmæli við skipulaginu. Á vefsíðu samtakanna er fjallað um fund bæjarstjórnar og segir þar m.a.: „Okkur blöskrar virðingarleysið sem íbúum Kársness er sýnt með þessari hraðafgreiðslu málsins á hásumarfrístíma og að ekki skuli hafa verið staðið við loforð um samráð.“ http://karsnes.is/?p=270

Virðingarleysi bæjarfulltrúa í meirihluta bæjarstjórnar Kópavogs gagnvart bæjarbúum ríður ekki við einteyming, það hefur sést í mýmörgum málum á þessu kjörtímabili og sjálfsagt er ekki öllu lokið enn.

Hverfagæsla einkafyrirtækja

Undanfarnar vikur hefur mikið verið rætt um þá ákvörðun meirihluta bæjarráðs Kópavogs að ráða einkaaðila til að sinna hverfagæslu í Kópavogi. Ekki eru allir á eitt sáttir við þá ákvörðun enda er það verkefni ríkisvaldsins að halda upp lögum og reglu um land allt, slíkt er enn sem komið er ekki á verksviði sveitarfélaga.

Seltjarnarnesbær reið á vaðið fyrir nokkrum árum og bætti hverfagæslu einkaaðila við þjónustu til sinna íbúa. Í sjálfu sér er allt gott um það að segja, íbúar Seltjarnarness eru tæplega 4.500 talsins og þeir búa allir á þeim 2 ferkílómetrum sem Seltjarnarnesbær nær til. Á fjárhagsáætlun Seltjarnarness ætlar bæjarstjórnin að veita 4,5 milljónum króna í verkefnið á árinu 2008.

Í fréttum hefur komið fram að Kópavogsbær áætlar að setja um 6-10 milljónir í verkefnið sem eigi að vera til reynslu til eins árs og að gert sé ráð fyrir að gæsla standi í tvo til sex tíma á dag. Gott og vel, sjálfsagt er þetta allt saman vel meint og í sjálfu sér gott að bæjarráð skuli með þessum hætti vilja stuðla að auknu öryggi íbúa bæjarins og eigna þeirra. Hitt vekur athygli að á meðan Seltjarnarnes, sem gjarnan hefur verið vísað til í þessu sambandi, veitir 4,5 milljónum á ári í verkefnið þá skuli Kópavogsbær aðeins veita í það 6-10 milljónum. Þó eru Kópavogsbúar rúmlega sex sinnum fleiri en Seltirningar og landsvæði Kópavogs fjörtíu sinnum stærra en Seltjarnarness eða 80 ferkílómetrar. Skyldi maður þá ekki ætla að ef meirihluta bæjarráðs væri fullkomin alvara með hverfagæslunni að í hana yrði sett það fjármagn sem dygði til að raunverulegt öryggi byggi þar að baki.

Seltirningar hafa nú verið með þetta verkefni í á þriðja ár. Þeir telja að 4,5 milljónir þurfi í verkefnið, sexföldun á þeirri tölu er nærri því að vera 30 milljónir en ekki 6-10 milljónir. Auk þess er landsvæði Kópavogs margfalt það sem er á Seltjarnarnesi svo eflaust þyrfti talan að vera mikið hærri ef vel ætti að vera.

Í mínum huga er ljóst að sýndarmennska fylgir þessari tillögu meirihluta bæjarráðs Kópavogs. Ef menn eru að tala í alvöru, þá þarf hugur að fylgja máli. Verkefnið eins og það stendur núna, þar sem eftirlitsbílar eiga að vera á ferli um bæinn 2-6 stundir á dag er ekki til þess fallið að auka öryggiskennd bæjarbúa. Það er sýndaröryggi og ekkert annað.