Sprengja í Kópavogi

Helsta frétt dagsins í dag var sprengja sem fannst í Fossvogsdal þar sem verið var að grafa fyrir nýju íþróttahúsi HK. Fréttaflutningur af sprengjunni var magnaður upp jafnt og þétt í dag og ég efast ekki um að þetta verður fyrsta frétt í sjónvarpsfréttum kvöldsins. Það er mikil mildi að ekki skuli hafa orðið slys á fólki og miðað við fréttirnar þá brást lögregla og allir þeir sem að málinu komu við á hárréttan hátt. Sprengjan virðist ekki hafa legið djúpt í jörðu, það var því gott að dr. Gunni notaði aðeins venjulega skóflu við fyrstu skóflustunguna að húsinu en ekki gröfu eins og stundum hefur tíðkast.

 

Mynd af vefsvæði Kópavogsbæjar af fyrstu skóflustungunni að íþróttahúsinu við Fagralund.

Athugasemdir

[Lilja Guðrún Þorvaldsdóttir, 21.5.2008 kl. 22:29]

Hefur engin skýring komið um hverskonar sprengja þetta var og hvaðan þessi sprengja hefur komið. Allt svona á að vera skráð ekki satt?

[Ingibjörg Hinriksdóttir, 21.5.2008 kl. 23:18]

Jú það kom fram að sprengjan mun vera flugvélasprengja úr seinna stríði. Það gengur upp gagnvart fluglínu að Reykjavíkurflugvelli sem mun vera þarna yfir. Neðst í dalnum er/var mikil mýri sem var síðar ræst út og þurrkuð með miklum skurðum svo ef flugvél hefur misst sprengjuna á þennan stað hefur hún fengið mjúka lendingu og sokkið í mýrina!

[Þorsteinn Ingimarsson (IP-tala skráð) 22.5.2008 kl. 13:40]

Það er eins gott að maðurinn á myndinni stakk skóflunni ekki of djúpt , annars hefði komið hvellur