Snjókoma og döpur úrslit

Þá er maður komin aftur úr Baunaríki, Danmörku, þar sem ég hef verið í snjókomu og kulda síðustu viku. Stúlknalandslið Íslands skipað leikmönnum yngri en 17 ára öttu þar kappi við stöllur sínar frá Danmörku, Rússlandi og Finnlandi. Þrátt fyrir að stelpurnar mínar hafi verið markahæsta lið mótsins, skoruðu 7 mörk í 3 leikjum, þá voru þær líka það lið sem fékk flest mörk á sig og töpuðu þær öllum leikjum sínum.

Heilt yfir er ég ánægð með ferðina, leikmennirnir, sem ég var að kynnast flestum í fyrsta sinn, eru upp til hópa kurteisar, dugmiklar og ákveðnar stúlkur sem eiga framtíðina fyrir sér í fótboltanum. En eftir að hafa verið í þetta mörg ár með kvennaliðum Íslands þá er eitthvað sem hvíslar í hnakkanum á mér um að ungir leikmenn í dag búi ekki yfir nægilegum aga og skipulagi og ungir leikmenn fyrir nokkrum árum síðan. Það má vel vera að þetta sé bara tilfinning hjá mér sem eigi sér enga stoð, og ég vona það raunar, en sumir leikmenn brotnuðu niður við minnsta mótlæti á meðan aðrir stóðu keikir og ákveðnir í að berjast fyrir sínu sæti í liðinu.

Það var meira en slæleg úrslit sem hrekktu íslenska liðið á mótinu. Vetur konungur ákvað að líta til Danmerkur einmitt á meðan við vorum þar og varð að fresta tveimur leikjum í mótinu um einn dag vegna snjókomu. Eins og sjá má á meðfylgjandi tengli þá varð ekki hjá því komist að fresta leikjum en myndirnar sem eru á tenglinum sýna ástandið fyrir fyrsta leik mótsins (sem fór fram á réttum tíma), en eftir þetta hélt áfram að snjóa og varð frestun ekki umflúin.

Stefnum hærra

Þetta eru ánægjuleg tíðindi og alveg í takti við það sem ég spáði þann 12. þessa mánuðar. Það er hins vegar ljóst að íslenska liðið vill og hefur getu til að stefna enn hærra. Ísland hefur getu til að sigra þjóðir eins og Ástralíu (12), Ítalíu (13), Finnland (16), Úkraínu (17) og ekki síst Holland sem er í 18. sæti heimslistans, sem nú hefur 12 stiga forskot á Ísland.

Staða Íslands nú er afrakstur gríðarlega mikillar vinnu þeirra leikmanna sem hafa leikið fyrir hönd Íslands sl. 5 ár. Þar er enginn leikmaður undanskilinn, ungur eða gamall, núverandi eða fyrrverandi. Allir leikmennirnir hafa lagt sitt af mörkum til að ná þeim árangri sem stefnt er að, sem er að komast á EM í Finnlandi 2009. Knattspyrnusambandið hefur lagt mikinn metnað í íslenska liðið og með markvissum hætti stuðlað að því að takmarkið náist. Það má ekki gleyma því að Róm var ekki byggð á einum degi og þeir sem fylgst hafa með íslensku kvennalandsliðunum í gegnum tíðina sjá árangur þess liðs sem hafnaði í 3. sæti Norðurlandamót U17 ára stúlknaliða sem fram fór á Íslandi 2002 var engin tilviljun. Þar báru liðið uppi leikmenn eins og Margrét Lára, Guðbjörg Gunnarsdóttir, Dórurnar (Dóra María og Dóra Stefáns) og Greta Mjöll Samúelsdóttir. Af 16 manna hópi hafa 11 þeirra sem léku með U17 árið 2002 leikið A-landsleik fyrir Íslands hönd, sem verður að teljast frábær árangur af þeim voru 8 leikmenn með liðinu á æfingamótinu í Portúgal fyrr í mánuðinum.

Íslenska þjóðin hefur í sívaxandi mæli fylgst með stelpunum sínum á vellinum og það er von mín að þjóðin muni ekki liggja á liði sínu í sumar þegar stelpurnar taka síðustu skrefin í átt til Finnlands. Þær þurfa á stuðningi þjóðarinnar að halda og ég er klár á því að Íslendingar munu ekki láta sitt eftir liggja. Áfram stelpur, Áfram Ísland!

Ísland í 19. sæti á FIFA listanum

Hefur afreksíþróttamönnum fækkað?

Í þættinum "Utan vallar" á Sýn ... úps, fyrirgefið Stöð 2 Sport, í gærkvöldi fullyrti þáttastjórnandinn að íslenskum afreksíþróttamönnum hafi fækkað og vísaði til þess að nú í lok mars hafi ekki nema svo og svo mörgum íþróttamönnum tekist að tryggja sér farseðilinn á Ólympíuleikana í Peking ... úps, fyrirgefið Bejing.

Enginn af viðmælendum þáttastjórnandans tók undir þá skoðun hans að afreksíþróttamönnum hefði fækkað og bentu m.a. á að enn væri tími til að tryggja sér farseðil til Bejing í haust. Nú væri t.a.m. tími frjálsíþróttamannanna að renna upp eftir strangar vetraræfingar og því ættu menn að fara hægt í svona fullyrðingar. Ég tek undir með viðmælendunum, mér finnst íslenskum afreksíþróttamönnum ekki hafa fækkað.

Það er tiltölulega auðvelt að velta upp nöfnum Rögnu Ingólfsdóttur bandminton, Ásdísar Hjálmsdóttur spjótkast, Söru Bjarkar Gunnarsdóttur knattspyrnu, Sunnu Jónsdóttur handknattleik, Fríðu Rúnar Einarsdóttur fimleikum og Sigrúnar Brár Sverrisdóttiur sund.  Með afrekskonur eins og þessar þarf Ísland engu að kvíða og mér finnst algjörlega óþarft að fara í einhvert svartsýniskast þó íslenskum þátttakendum á Ólympíuleikum fækki um 2 eða 3. Framtíðin er björt í íslenskum íþróttum.

Gunnsteinn var vanhæfur!

Eftirfarandi frétt birtist á vef www.mbl.is í dag.

Samgönguráðuneytið hefur úrskurðað fyrrverandi formann Íþrótta – og tómstundaráðs í Kópavogi, Gunnstein Sigurðsson, vanhæfan til að fjalla um ráðningu í stöðu verkefnisstjóra æskulýðs- og tómstundarmála í Kópavogi. 

Guðríður Arnardóttir og Hafsteinn Karlsson bæjarfulltrúar Samfylkingarinnar kærðu ákvörðun ÍTK til samgönguráðuneytisins og töldu óeðlilegt að Gunnsteinn tæki þátt í ráðningaferlinu vegna tengsla sinna við einn umsækjandann. 

Viðkomandi umsækjandi hafði verið undirmaður Gunnsteins til margra ára, hann var meðmælandi hennar á umsókn um starfið og mælti hann með henni í starfið þegar ákvörðun var tekin um ráðningu.  Þá var ráðningin umdeild þar sem gengið var fram hjá umsækjendum með meiri menntun og reynslu í málaflokknum,  samkvæmt upplýsingum frá bæjarfulltrúa Samfylkingarinnar í Kópavogi, Guðríði Arnardóttur.

Í umsögn ráðuneytisins segir: „Gunnsteinn var vanhæfur til að taka þátt í ráðningaferlinu með þeim hætti sem það fór fram, þar sem hann var jafnframt meðmælandi eins umsækjanda og yfirmaður hennar.  Honum var því óheimilt að taka þátt í afgreiðslu málsins með tillögu um ráðningu til bæjarstjórnar.”

Ráðuneytið fellst því á körfu kærenda um vanhæfi formannsins vegna ráðningar í stöðu æskulýðs- og tómstundarmála en telur ekki sýnt fram á að ráðninguna eigi að ógilda.

Er bæjarstjórinn að undirbúa brotthvarf sitt?

Á bæjarstjórnarfundi í Kópavogi í síðustu viku var m.a. fjallað um fyrirhugaða heimsókn fulltrúa Kópavogsbæjar til borgarinnar Wuhan í Kína. Þangað hefur meirihluti bæjarstjórnar samþykkt að senda nokkra fulltrúa bæjarins enda barst boð til bæjarstjóra um að taka þátt í viðskiptaráðstefnu, Expo Central China 2008. Ráðstefnan fer fram í lok apríl og vil ég hvetja þá sem þennan pistil lesa til að kynna sér hvað er í boði á ráðstefnunni og meta það með sjálfum sér hvort ferðalagið sé réttlætanlegt.

Eftir að hafa kafað ofaní dagskrá ráðstefnunnar þá er mér útilokað að skilj a hvaða erindi fulltrúar bæjarstjórnar Kópavogs eiga á þessa ráðstefnu. Ljóst er á öllu að þarna verður heljarinnar mikil og flott sýning á öllu mögulegu en það eina sem hugsanlega getur komið Kópavogsbæ og Kópavogsbúum að gangi er að fulltrúar okkar taki virkan þátt í umræðum um "sjálfbæra þróun borgarskipulags", sem á ensku útlegst "Urban Sustainable Development". Má ég nú biðja þann sem trúir því að bæjarstjórinn í Kópavogi sé að fara yfir hálfan hnöttinn til að sitja ráðstefnu um sjálfbæra þróun borgarskipulags um að rétta upp hönd! 

Miðað við endalausan áhuga bæjarstjórans á að byggja upp karlmennskutákn í formi háhýsa í Smárahverfi og þess að hann flengist um hnöttinn þveran og endilangan í boði bæjarsjóðs Kópavogsbæjar þá læðist að mér sá grunur, eða kannski er þetta óskhyggja, að bæjarstjórinn í Kópavogi sé að undirbúa brottför sína úr bæjarstjórn. Það væri þá bara óskandi!

 

Ósannindi

Fátt fer meira í taugarnar á mér en ósannindi. Það má því ímynda sér hvernig mér líður þegar ósannindin eru sögð aftur og aftur og aftur. Á sunnudag var ég verulega pirruð, íþróttafréttamenn Ríkisútvarpsins fóru þá æ ofan í æ með ósannindi varðandi landsleik í Kórnum þar sem Ísland og Færeyjar mættust í vináttulandsleik.

Í upphafi fréttatímans í útvarpinu var sagt frá sigri Íslands á Færeyjum í fyrsta landsleiknum í knattspyrnu sem fram fer innanhúss. Í íþróttafréttunum sjálfum var þetta síðan endurtekið. Þá var komið að sjónvarpsfréttunum. Aftur var sagt frá því að Ísland hafi leikið fyrsta landsleikinn innanhúss gegn Færeyjum á sunnudag. Og að sjálfsögðu endurtóku íþróttafréttamenn RÚV ósköpin þegar kom að íþróttafréttunum í lok fréttatímans.

Einhvern er sjálfsagt farið að gruna að ég sé ekki alveg sammála þeirri staðhæfingu að leikurinn á sunnudag hafi verið fyrsti landsleikur Íslands innanhúss í knattspyrnu. Mínar upplýsingar eru þær að fyrsti landsleikur Íslands í knattspyrnu innanhúss hafi farið fram þann 10. nóvember 2004. Þá lék Ísland við Noreg um laust sæti á Evrópumótinu 2005 og tapaði nokkuð örugglega 2-7. Þann 21. nóvember 2006 lék Ísland við England í Akraneshöllinni, lekurinn tapaðist 0-4. Tveimur dögum síðar, lék Ísland aftur við England, að þessu sinni í Egilshöll, og aftur mátti Ísland sætta sig við tap,að þessu sinni 0-3.

Á þessari upptalningu má sjá að leikur Ísland og Færeyja á sunnudag var fjórði landsleikur Íslands sem leikinn er innandyra hér á landi og það að mínu viti algjörlega óþolandi að íþróttafréttamenn Ríkisútvarpsins geti ekki haft svo einfalda hluti rétta. Aðrir fjölmiðlar voru með þetta rétt, ef ég hef tekið rétt eftir.

Rétt er að leikur Íslands og Færeyja var fyrsti leikur A-landsliðs karla innanhúss. Fyrsti landsleikurinn sem leikinn var innanhúss hér á landi, í nóvember 2004, var leikur kvennalandsliðsins og er það jafnframt eini leikurinn sem ekki er vináttuleikur. Leikirnir árið 2006 voru vináttuleikir U19 ára stúlknalandsliðsins í undirbúningi liðsins fyrir úrslitakeppni EM sem fram fór hér á landi sl. sumar.

Það er von mín að íþróttafréttamenn RÚV hafi aðeins verið óvandvirkir en ekki sýnt af sér fordóma gagnvart knattspyrnu kvenna með fréttum sínum. Ég vona líka að þeir muni í framtíðinni vanda sig meira við fréttasmíðar sínar en mér finnst ljóst að eftir brotthvarf Samúels Arnar Erlingssonar og Geirs Magnússonar hefur dregið úr vandvirkni á stofnuninni.

Áfram Ísland

Leiknum lauk 3:0. Margrét Lára Viðarsdóttir skoraði fyrsta mark Íslands í leiknum, Rakel Hönnudóttir bætti öðru marki við fyrir leikhlé en það var síðan Guðrún Sóley Gunnarsdóttir sem gulltryggði sigurinn í uppbótartíma.

Leikurinn í dag er mjög mikilvægur fyrir Ísland og íslenska knattspyrnu. Með sigri á Finnum í dag er alveg ljóst að Ísland mun færast enn ofar á styrkleikalista FIFA en þar sitjum við nú í 21. sæti. Það er of neðarlega að mínu mati. Ísland hefur getu til að sigra þjóðir eins og Ástralíu (12), Ítalíu (14), Finnland (16) og þær þjóðir sem koma þar á eftir, Úkraínu, Holland, Tékkland og Spán. Reyndar er staðan á styrkleikalistanum í dag þannig að aðeins munar 15 stigum á Tékklandi sem er í 19. sæti listans og Íslandi í 21. sæti, á milli þeirra er Spánn.

Hver leikur sem íslensku stelpurnar leika skipta miklu máli. Þær keppa nú um að komast í úrslitakeppni Evrópumótsins sem fram fer í Finnlandi á næsta ári. Eins og áhugamenn um knattspyrnu vita þá eiga þær góða möguleika á að það takmark náist. Til þess þarf liðið þó öflugan stuðning allra, ekki aðeins KSÍ og félaganna sem sinna stelpunum heldur ALLRA ÍSLENDINGA. Þjóðin sýndi það svo um munaði sl. sumar þegar liðið lék gegn Serbum á Laugardalsvelli að hún stendur að baki stelpunum. Sá stuðningur þarf að halda áfram og nú þurfa allir að senda hlýjar hugsanir til Portúgals þar sem enn er góður klukkutími eftir af leiknum.

Áfram Ísland!

Ísland vann Finnland 3:0 í leiknum um 7. sætið

Umhverfisráð fundar ekki

Umhverfisráð Kópavogs, sem ekki hafði fundað síðan fyrir jól hittist loks sl. mánudag en þá var var lagt fyrir nefndina mál sem þegar hafa verið samþykkt í bæjarráði. Telja má víst að ástæður þess afð fundur í ráðinu var loks haldinn hafi verið ítrekaðar fyrirspurnir bæjarfulltrúa Samfylkingarinnar um orsakir fundarleysisins. 

Það verður að telja mjög sérkennilegt að á dagskrá fundarins var nýtt skipurit, ný starfslýsing og ný staða sviðsstjóra sem þegar hefur hafið störf og starfslýsing sem þegar hafði verið samþykkt í bæjarráði. Ætla mætti að það væri eðlilegt að umhverfisráð legði mat skipurit nýs sviðs áður en það er lagt fyrir og samþykkt í bæjarráði. Á bæjarstjórnarfundi sem haldinn var í dag var formaður umhverfisráðs, sem sat bæjarstjórnarfundinn, spurð út í það af hverju nefndin hafi ekki verið kölluð saman í þrjá mánuði. Svar hennar kom öllum á óvart: „Þú þarft að spyrja bæjarstjórann að því.“

Hvernig ætli standi á því að formaður umhverfisráðs getur ekki svarað því á bæjarstjórnarfundi af hverju nefndin sem hún er í forsæti fyrir hafi ekki fundað um þriggja mánaða skeið? Af hverju treystir formaðurinn sér ekki til að svara svo einfaldri spurningu? Það læðist að manni sá grunur að einhver maðkur sé í mysunni, það mætti jafnvel halda að ósætti væri innan Sjálfstæðisflokksins í Kópavogi þar sem bæjarstjórinn hefur deilt og drottnað í nær 20 ár. Af hverju vísar formaðurinn á bæjarstjórann í málinu? Ákveður bæjarstjórinn hvenær það á á halda fundi í umhverfisráði og hvenær ekki?

Oddviti Samfylkingarinnar í Kópavogi hefur sent frá sér grein um málið sem mun birtast í Fréttablaðinu á næstu dögum. 

Fulltrúinn ekki boðaður á fund

Á bæjarstjórnarfundi sem nú fer fram hefur m.a. verið fjallað um fund sem haldinn var í svæðisskipulagsnefnd höfuðborgarsvæðisins. Í þeirri nefnd eiga sæti tveir fulltrúar frá Kópavogsbæ, rétt eins og öðrum sveitarfélögum sem heyra undir nefndina. Annar fulltrúi Kópavogsbæjar er fulltrúi meirihlutans, Einar Kristján Jónsson, og hinn fulltrúinn er Jón Júlíusson bæjarfulltrúi Samfylkingarinnar.

Svæðisskipulagsnefnd hélt sérstakan sáttafund vegna skipulags í Glaðheimum en Garðbæingar hafa mótmælt þeim hugmyndum sem meirihluti bæjarstjórnar Kópavogs hefur komið fram með. Þar var reiknað með allt að 200.000 fermetrum. Á þetta hafa bæjarfulltrúar Samfylkingarinnar í Kópavogi og ekki heldur Garðbæingar verið tilbúnir að fallast og á sáttafundi sem boðaður var komust menn að niðurstöðu um 158.000 fermetra en þó bregður svo við að fulltrúi Samfylkingarinnar, Jón Júlíusson er ekki boðaður á fundinn.

Segja má að með þessu hafi lýðræðisleg hugsun meirihluta bæjarstjórnar Kópavogs kristallast. Meirihlutinn hefur til þessa ekki gert hina minnstu tilraun til að komast að sameiginlegri niðurstöðu innan bæjarstjórnar Kópavogs um framkvæmdir á Glaðheimasvæðinu. Meirihlutinn hefur ekki í neinu brugðist við þeirri ábendingu Samfylkingarinnar að það þurfi að líta á Smárasvæðið sem eina heild en ekki aðeins að horfa á Glaðheimareitinn. Það er líka verið að byggja umtalsvert á reitum í kringum Smáralind og Smáratorg, fyrirhugað er að byggja á Nónhæð, fyrirhugað er að auka byggingarmagn við Dalveg umtalsvert og nú standa yfir framkvæmdir við Lindir IV. Samtals eru uppi hugmyndir um hátt á 500.000 fermetra byggingarmagn á svæðinu öllu. Þó Glaðheimasvæðið sé sannarlega stórt í þessu samhengi þá verður að horfa á heildarmyndina en því hafa fulltrúar meirihlutans algjörlega neitað þeir vilja halda áfram í sínum bútasaumi sem er í raun ekkert annað en blekkingarleikur gagnvart íbúum bæjarins.

Bæjarstjórnarfundur í beinni útsendingu

Bæjarstjórnarfundum í Kópavogi er útvarpað á FM 98,3. Í dag átti ég ekki heimangengt á bæjarstjórnarfundinn sökum lasleika en sat hins vegar heima og hlustaði. Yfirleitt eru fundir bæjarstjórnar undirlagðir af svívirðingum bæjarstjórans í garð bæjarfulltrúa Samfylkingarinnar en þegar svo vill til að bæjarstjóri mætir ekki þá fara fótgönguliðarnir af stað. Fundurinn í dag er einn slíkur. Bæjarstjórinn er fjarverandi og hinar ótrúlegustu skoðanir hafa fengið að fjúka úr vestrinu.