Skynsamleg ákvörðun Ingibjargar Sólrúnar

Í dag bárust af því fréttir að Ingibjörg Sólrún Gísladóttir, formaður Samfylkingarinnar, hefði tekið ákvörðun um að draga sig í hlé frá stjórnmálum. Ég verð að segja að mér finnst þessi ákvörðun ákaflega skynsamleg. Persónulega þekki ég Ingibjörgu Sólrúnu ekki neitt, en ég veit hvernig það er að vera veikur og ég veit það líka hvernig það er að liggja inná spítala og leggja líf sitt í hendur þess fólks sem þar starfar. Mér fannst það því vægast sagt undarleg ákvörðun hjá henni að draga sig ekki í hlé þegar hún greindist með sitt mein í byrjun október.

Ég hef frá því að bankahrunið dundi á okkur ítrekað sagt mína skoðun á ástandinu hér á blogginu. Ég hef alls ekki alltaf verið ánægð með stöðuna og þær ákvarðanir sem hafa verið teknar, en ég hef þá trú að þetta skref Ingibjargar Sólrúnar verði til þess að flokkurinn fái endurnýjað traust landsmanna. Framundan eru vægast sagt spennandi tímar í prófkjörum, bæði hér í Suðvesturkjördæmi og ekki síður í Reykjavík. Það er von mín að flokknum og flokksmönnum beri gæfa til að velja sér kröftugan og aflmikinn formann sem mun leiða Ísland í átt að nýjum tímum þar sem hugsjónir jafnaðarmanna verði hafðar í forgrunni.

Ingibjörgu Sólrúnu Gísladóttur færi ég bestu óskir um góðan bata og ég veit að hún hefur ekki sagt sitt síðasta orð þó hún dragi sig nú í hlé um stundarsakir.

Athugasemdir

[Hilmar Gunnlaugsson, 8.3.2009 kl. 19:38]

Ég vona að Ingibjörgu batni og hún komi aftur síðar í stjórnmálin. Jóni Baldvini treysti ég reyndar til formannsstarfa og tel einna líklegast að hann verði næsti formaður Samfylkingarinnar.

[Helgi Jóhann Hauksson, 8.3.2009 kl. 22:48]

Jón Baldvin er flottur en nú held ég að sé tími Jóhönnu og hvet hana til að gefa kost á sér t.d. í tvö ár í senn.

Vona annars að Ingibjörg nái heilsu sinni hratt og vel.

[Ingibjörg Hinriksdóttir, 8.3.2009 kl. 22:49]

Sammála um að Jón Baldvin er flottur. En mér finnst hann flottari þar sem hann er. Utan vallar, rífandi kjaft og segjandi mönnum til um hvernig þeir eiga að spila úr spilum sínum.

Hvað segið þið félagar um Guðbjart Hannesson?

[Hilmar Gunnlaugsson, 8.3.2009 kl. 23:18]

Guðbjartur þykir ekki líklegur sem næsti formaður.

[Ingibjörg Hinriksdóttir, 8.3.2009 kl. 23:21]

Af hverju ekki? Rök Hilmar, rök!

[Hilmar Gunnlaugsson, 8.3.2009 kl. 23:27]

Ég tel að Jón Baldvin sé of erfiður andstæðingur fyrir hann og einnig Jóhanna, kjósi hún að fara í framboð. Það eru mín rök

[Ingibjörg Hinriksdóttir, 8.3.2009 kl. 23:29]

En ef við gefum okkur það að hvorugt þeirra fari fram?

[Hilmar Gunnlaugsson, 8.3.2009 kl. 23:33]

Þá gætu möguleikar opnast fyrir hann en ég efa að Jón Baldvin dragi framboð sitt til baka.

[Svala Jónsdóttir, 9.3.2009 kl. 00:23]

Guðbjartur er varla nógu öflugur eða afgerandi til að halda flokknum saman, þar á meðal þingflokknum. Það má reyndar segja um fleiri.

[Helgi Jóhann Hauksson, 9.3.2009 kl. 01:52]

Guðbjartur hefur ekki enn sýn þá snerpu og röggsemi sem ég vildi að foringi byggi yfir, - en annars fínn og flottur kall.

[Helgi Jóhann Hauksson, 9.3.2009 kl. 01:56]

Tilbúinn til að skipta um skoðun um leið og ég sæi á Guðbjarti þá hlið sem ég leita eftir.

[Jenný Anna Baldursdóttir, 9.3.2009 kl. 08:18]

Ég er sammála hverju orði í pisli þínum.

[Kristján P. Gudmundsson, 9.3.2009 kl. 14:19]

Ég sé ekki betur, en "heilög" Jóhanna sígi saman undan þeirri byrði, sem hún rogast með nú þegar ?

Ég hélt, að mannval innan Samfó væri meira en raun ber vitni ? Össur sagði nýlega, að Samfó framleiddi leiðtogaefni á færibandi eða er hann síljúgandi ?

Með kveðju, KPG.