Kópavogur bærinn minn - 5. hluti

Hér hef ég aðeins sagt frá örfáum deiluefnum sem oddvitarnir hafa efnt til með sínum óvenjulega stjórnunarstíl, sem kannski væri eðlilegra að kalla alræðistilburði. Ótalin eru ýmis mál, s.s. deilur vegna kaupa á löndum í Glaðheimum og Vatnsenda, hagsmunatengsl vegna verkefnaúthlutana í útgáfumálum bæjarins og einkavinaráðningar inná bæjarskrifstofurnar.

Miðað við framkomu bæjarstjórans í minn garð í aðdraganda kosninga hefði ekkert átt að koma mér sérstaklega á óvart þegar ég mætti á mína fyrstu bæjarstjórnarfundi í upphafi kjörtímabilsins 2006-2010. Ég væri hins vegar að segja ósatt ef ég segði að það hafi ekki komið mér á óvart var hversu dónalegur og ruddalegur bæjarstjórinn er í garð bæjarfulltrúa á opinberum fundum. Ekki síður kom mér á óvart hversu mikill undirlægjuháttur er innan Sjálfstæðisflokks og Framsóknarflokks gagnvart oddvitanum, með einni undantekningu þó. Fyrir það fyrsta þá talar bæjarstjórinn niður til allra þeirra sem ekki eru sammála honum í einu og öllu, gildir þá einu hvort viðkomandi séu með honum í flokki eða ekki, en vissulega er örlítill blæbrigðamunur þar á. Hann hikar ekki við að segja andstæðinga sína í bæjarstjórn ljúga, vera skyni skroppna og óundirbúa á bæjarstjórnarfundum.  Á þeim fundum sem ég hef setið hefur forseti bæjarstjórnar látið það algjörlega óátalið af bæjarstjóranum en ef samskonar brigsl eru borin á bæjarstjórann stekkur forseti hins vegar upp og áminnir bæjarfulltrúa um virðingu gagnvart bæjarfulltrúum og fundi bæjarstjórnar, þar skiptir öllu máli hvar í flokki menn eru.

Nýjasta dæmið um þvingunarstarfsemi bæjarstjórans eru siðareglur sem samkomulag var um að taka upp innan stjórnkerfis Kópavogsbæjar. Var það skoðun bæjarfulltrúa minnihlutaflokkanna að samkomulag væri um að siðareglurnar væru unnar í samvinnu allra flokka. En á síðasta bæjarstjórnarfundi ber svo við að bæjarstjóri leggur siðareglurnar fram til fyrri umræðu, án þess að bera frumdrög þeirra undir minnihlutann. Og ekki nóg með það, hann ætlaðist til þess að reglurnar yrðu samþykktar til síðari umræðu án mikilla athugasemda af hálfu minnihlutans. Við slíkt var að sjálfsögðu ekki unað af okkar hálfu en í þessu máli eins og svo mörgum öðrum var meirihlutavaldi beitt í þeim tilgangi einum að aðeins ein skoðun sé markæk, þannig var lýðræðið borið ofurliði og raddir okkar hafa mátt sín lítils.

Þá hafa Stjórnsýslulög ekki skipt þennan meirihluta neinu máli, nema þau komi sér vel til að kvelja minnihlutaflokkana. Skiptir þá engu hvort um er að ræða mannaráðningar, hæfniskröfur eða óeðlileg afskipti af skipulagsmálum. Vissulega hef ég oft snöggreiðst inná bæjarstjórnarfundum, ég hef oft blygðast mín fyrir framkomu oddvita meirihlutaflokkanna í fjölmiðlum og ég hef oft  mátt þola háðsglósur frá vinum og félögum vegna þeirra. Sem betur fer hefur húmorinn þó oftar en ekki bjargað geðheilsunni sem og vissan um að mín störf þoli alla skoðun og að ég hafi starfað af heilindum og með hagsmuni bæjarbúa að leiðarljósi.

Engu að síður hef ég komist að þeirri niðurstöðu að þátttaka í bæjarpólitíkinni í Kópavogi sé beinlínis mannskemmandi. En við Íslendingar höfum oft mátt þola mótlæti og þrátt fyrir að mér finnist ég ekkert brjálæðislega gömul þá veit ég að orð Bjarna Thorarensens í ljóðinu Ísland eigi jafnvel við í dag eins og á þeim dögum þegar ljóðið var samið. „Fjör kenni oss eldurinn, frostið oss herði" orti Bjarni og á mér er engan bilbug á mér að finna. Ég hef lært að bregðast við skrúðmælgi bæjarstjórans og fylgisveina hans og á sama tíma þessi háttsemi þeirra félaga hefur þjappað okkur félögunum í Samfylkingunni saman. Okkur hefur því reynst létt verk að verjast ósanngjörnum og óvönduðum málflutningi þeirra í okkar garð. Það hafa bæjarbúar líka gert og fullyrði ég að það fyrirfinnast ekki íbúar í einu sveitarfélagi sem eru jafn mikið á varðbergi gagnvart stjórnsýslu meirihluta bæjarstjórnar og einmitt hér í Kópavogi.

Þá vakt mun ég standa með íbúum þessa yndislega bæjar áfram. Ég er og verð Kópavogsbúi nú og alltaf. Það hef ég verið í 45 ár og mun halda áfram að standa vörð um bæinn minn, sama hversu heitt bæjarstjórinn óskar þess að ég hverfi á braut!

Athugasemdir

[Helga Kristjánsdóttir, 19.2.2009 kl. 21:42]

Já,ljóðlínur gömlu skáldanna eiga við í dag;
     
          Er synd að játa sannleikann,

          er synd að elska nokkurn mann.


                   
                        

[Lilja Guðrún Þorvaldsdóttir, 19.2.2009 kl. 21:42]

Ég held að þetta sé síðast ár Gunnars sem bæjarstjóri, það hvarflar varla að nokkrum manni að kjósa hann aftur.

 Það á enginn að sitja svona lengi við völd, það kallar bara á einræðistilburði, og þá er hætta á spillingu og misnotkun á valdi.

Það nægir að líta til landsmálanna og þess hversu lengi Sjálfstæðisflokkurinn hefur setið við kjötkatlanna, til að sýna hversu hættuleg of löng samfelld valdaseta er hverju samfélagi.

[Helga Kristjánsdóttir, 19.2.2009 kl. 23:17]

Hæ! aftur var að hugsa um að setja gæsalappir utan um orðið  elska    vil ekki spilla annara manna skáldskap svo ég hætti við. þú getur líka ritskoðað auk þess góður lesari milli lína,mér er tamt að segja hluti í sem fæstum orðum. Nú skal knúsa stórt

[Sigurður Haukur Gíslason, 20.2.2009 kl. 00:55]

Þið standið ykkur vel.

Fleyg eru orð Gunnars þegar Samfylkingin var að gagnrýna kaup bæjarins á Gust-landinu. (Sem að Kópavogur reyndar átti því þetta voru leigulóðir.)

"Samfylkingin er á móti uppbyggingu í bænum."

Og þar með afgreiddi bæjarstjórinn málið.

[Ingibjörg Hinriksdóttir, 20.2.2009 kl. 18:12]

Kærar þakkir fyrir athugasemdirnar. Allar eru þær góðar og gildar. Vonandi hafa þessir pistlar mínir varpað örlitlu ljósi á því hver mín upplifun er af bæjarstjórninni.

[Margrét Júlía Rafnsdóttir, 21.2.2009 kl. 23:04]

Þetta er frábær samantekt Ingibjörg.Við sem höfum starfað fyrir minnihlutann í nefndum bæjarins vitum að sjálfstæðismenn í nefndunum verða að sitja og standa eins og bæjarstjóra hentar, annars eru þeir settir út í kuldann. Það segja þeir sjáfir. Já eins og ég hef áður sagt; Alþýða landsins er búin að átta sig á þeirri spillingu sem hefur átt sér stað í landinu undanfarin ár og voanandi fer öll alþýða Kópavogs að vakna fvo hægt verði að hreinsa til í bænum. Já koma svo!

[TARA, 22.2.2009 kl. 02:16]

þú lætur nú ekki þennan apakött flæma þig burt úr bænum þínum...þessi bæjarstjóri má fara fja----- til fyrir mér, hef aldrei verið hrifin af honum og þrasa stundum við frænda þinn um hann !!

[TARA, 22.2.2009 kl. 03:26]

Sæl, láttu ekki þennan apakött flæma þig burt úr bænum þínum...hann má fara fjan---- til fyrir mér, hefur aldrei fallið við hann og þrasa stundum um hann við frænda þínn....

[Magnús Helgi Björgvinsson, 22.2.2009 kl. 14:11]

Tek undir með fólkinu hér að ofan. Ég er sleginn yfir nokkrum atriðum sem þú hefur þurft að sæta. Eins og orðum Gunnar til þín en sérstaklega að Ómar skuli hafa klagað þig til vinnuveitenda þinna fyrir athugasemd á bloggsíðu Guðríðar.

Ég hef sagt það nú í mörg ár eins og þú talar um hér í þessum pistlum að áherslur í Kópavogi er og hafa verið nú síðustu áratugi ekki verið mannvænlegar heldur allt of mikið tekið til þarfa verktaka. Bærinn þanist út en innviðirnir ekki tekið mið af því að hér býr fólk með fleiri þarfir en byggingarlóðir. Þannig tel ég að verslunar og viðskiptahverfið á Dalvegi og í Hlíðarsmáranum sé dæmi um stórkostleg mistök. Þar hefði verið hægt að skapa miðbæ sem væri aðlaðandi og manneskjulegur. En í dag eru þetta þyrpingar ósamstæðra húsa sem ekki er hægt að komast á milli nema á bílum.  Og öll sú turnavæðing sem er komin af stað og stóð til að byggja þarna út um allt, varpar skuggum á hverfin sem voru þar fyrir og skerða t.d. útsýni þúsunda íbúa sem búa t.d. í Suðurhlíðum Kópavogs.

Má ég þá heldur biðja um gamla góða "Félagsmálabæinn" minn.

[corvus corax, 23.2.2009 kl. 11:33]

Það er eins og fólk hafi ekki tekið eftir því eða áttað sig almennilega á því að Kópavogi er stjórnað af einum manni, eftir geðþótta eins manns, með hroka og yfirgangi eins manns og undir kraumar spillingin, múturnar og hagsmunafyrirgreiðslan. Þessi maður er bæjarstjórinn Gunnar Birgisson, sem er svo nákvæmlega skítsama hvað bæjarbúum finnst, þeir eiga bara að borga útsvarið sitt og halda svo kjafti á meðan bæjarstjórinn misnotar fé bæjarbúa og stöðu sína sem bæjarstjóri. Það er þyngra en tárum taki ef Kópavogsbúar ætla enn einu sinni að kjósa þennan glæpalýð meirihlutans yfir sig aftur með spillingar-hrokagikkinn Gunnar Birgisson í broddi fylkingar.

[Smári Jökull Jónsson, 23.2.2009 kl. 16:11]

Mjög svo áhugaverðir pistlar hjá þér Ingibjörg. Maður hefur oft heyrt af framkomu bæjarstjórans og oftar en ekki hefur maður verið gapandi yfir orðum hans í garð samstarfsfélaga sinna, hvort sem þeir eru í minnihluta eða meirihluta.

Félagi hans, vallarstjórinn knái, er auðvitað kapítuli útaf fyrir sig. Ég varð til dæmis vitni að ótrúlegri framkomu hans gagnvart ungum manni í sumar, þegar ég var við störf fyrir Fréttablaðið eftir leik í Landsbankadeildinni á Kópavogsvelli. Þá sá ég hvernig mann hann hafði að geyma.

Hvet þig til að halda áfram baráttunni fyrir Samfylkinguna í Kópavogi - ef allt gengur að óskum þá verður staðan orðin skemmtilegri eftir sveitastjórnarkosningar 2010