Austurvöllur 8. nóvember 2008

Allt frá barnæsku hef ég haft skoðanir á flestum hlutum. Snemma tók ég afstöðu til stjórnmála og skoðun á fótbolta hefur fylgt mér alla tíð. Ég hef hins vegar ekki verið mikill mótmælandi. Mig minnir að ég hafi þrammað einu sinni niður Laugaveg 1. maí og einhverju sinni mætti ég á Arnarhól til að mótmæla einhverju sem ég man ekki lengur hvað var.

En það eru breyttir tímar. Ísland stendur á tímamótum og í fyrsta sinn í sögunni lítur út fyrir að okkar framsækna og harðduglega þjóð þurfi að bakka mörg skref aftur í tímann til þess að komast út úr þeim þrengingum sem nú steðja að. Þessi staðreynd dró mig á fund í Iðnó í dag og síðar á mótmælafund á Austurvöll. Fundurinn í Iðnó var málefnalegur og góður þó ekki tækist stjórnmálamönnunum að klóra sig út úr þeim spurningum sem til þeirra var beint og sannast sagna var ég ekki ánægð með neinn þeirra sem sátu fyrir svörum. Frummælendur voru hins vegar hver öðrum betri og margt til í því sem þeir sögðu, þó ég sé ekki sammála öllu því sem þar kom fram.

Á Austurvelli var fjöldi fólks, að minnsta kosti 500 manns (svo maður haldi sig við áður uppgefnar tölur fjölmiðlanna). Þar voru fluttar ræður og mannfjöldinn ýmist klappaði eða púaði ... allt eftir þeirri stemmingu sem ræðumenn buðu uppá. Þeir sem voru samankomnir á Austurvelli áttu það eitt sameiginlegt að vera reiðir. Íslendingar eru orðnir reiðir, það er skiljanlegt og sjálfsagt. Íslendingar eiga að vera duglegir að koma saman og mótmæla, við eigum að láta stjórnmálamennina, bankamennina og útrásarvíkingana vita að okkur standi ekki á sama. Við munum ekki sitja lengur prúð, hlusta og samþykkja þegar þjóðin er skuldsett með tölum sem enginn kann að nefna. Fundir eins og sá á Austurvelli í dag og undanfarna laugardaga eru kjörin leið til þess að láta í okkur heyrast.

Hitt er svo annað mál að ég get ekki með nokkru móti samþykkt ofbeldi í mótmælum, hvaða nafni sem það nefnist. Eggjakast í Alþingishúsið flokkast að mínu mati undir ofbeldi. Slíkt mun ég aldrei samþykkja. Til hvers að láta reiði sína bitna á dauðum hlutum? Hver græðir á því? Menn verða að finna reiði sinni útrás og ef þátttaka í mótmælum á Austurvelli og í umræðum í Iðnó er ekki nóg þá verða menn að finna aðra leið til að losna við reiðina. Spaugstofan kom þó með ansi fína hugmynd í kvöld. Ekki láta reiðina bitna á húsum, bílum, reiðhjólum eða barnavögnum.

Það er í lagi að vera reið, en sýnum stillingu.

Athugasemdir

[Helga Kristjánsdóttir, 8.11.2008 kl. 22:42]

REIÐI,kraumar í mér,8.nov vekur upp óhugnað,Ingo þessum degi er ekki hægt að gleyma í minni stórfjölskildu.Þennan dag hvarf elskulegur vinur og bróðir tengdadóttur minnar Einar Örn Birgis,minningin um leitina vonina,horfandi upp á falskan morðingjan,kyssa móðurina og biðja með okkur í kirkju. Þú þurrkar þetta út ef það má ekki vera hér. Kveð.

[Ingibjörg Hinriksdóttir, 9.11.2008 kl. 00:02]

Helga mín, þú mátt vera reið og þú mátt finna reiði þinni útrás hér. Ég man vel eftir þessum degi og því sem fylgdi í kjölfarið. Guð blessi minningu Einars Arnar.

[Sindri (IP-tala skráð) 9.11.2008 kl. 01:51]

Hvernig í ósköpunum geturðu flokkað eggjakast sem ofbeldi?! Þú spyrð hvers vegna fólk eigi að láta reiði sína bitna á dauðum hlutum. Hvernig geta dauðir hlutir liðið ofbeldi. Það verður fyrst ofbeldi þegar eggjunum verður kastað í smettið á ráðamönnum á gapastokkum á austurvelli!

[Georg P Sveinbjörnsson, 9.11.2008 kl. 02:09]

Maður vonar innilega að menn fari í það minnsta ekki að beita líkamlegu ofbeldi, það má bara ekki gerast og mig langar ekki að sjá átök eins og við Rauðavatn í margfeldi, hætt við flæstir nema þeir alhörðustu þori að mótmæla með mætingu eftir það, hópslagsmál við lögreglu og götuvígi á samt ekki vera virkileg hætta ef þetta lið bara drullast frá og það fljótt. Þolinmæðin er greinilega á lágmarki fyrir dansandi strengjabrúðum sem hafa lítilvirt Alþingi innan frá og leyft stoðum þess að fúna á mun afdrifaríkari hátt en nokkurt egg eða tómatur getur nokkurntíman megnað, feginn að þetta var ekki grjót.

 Meirihluti mótmælenda af eldri kynslóðum var spakur en þungbúinn, þeir yngri eru gjarnir á að vera róttækari og sjást ekki alltaf fyrir. 

Ekki gott að gefa lögreglunni  tilefni til að vera mætt með óeirðasveitina næsta Laugardag og varaliðið sennilega til taks,held að gæti skorist illilega í brýnu ef þeir gera það eða ætla reyna á einhvern hátt að leysa mótmælin upp vegna ógnandi framkomu og skemmdarverka fárra. Margt reitt fólk samankomið og vígalegir lögreglumönnum í röðum með skildi er ansi eldfimt ástand.

[Ævar Rafn Kjartansson, 9.11.2008 kl. 13:43]

Það voru sennilega milli 4-5000 manns þarna!

[Ingibjörg Hinriksdóttir, 9.11.2008 kl. 14:03]

Sæll Sindri, ofbeldi er afstætt hugtak. Það getur verið ákaflega mismunandi bæði andlegt og líkamlegt. Segja má að ég skilgreini ofbeldi sem verknað, sýnilegan eða ósýnilegan, sem framinn er með illum/reiðum hug gegn annarri persónu eða eigum hennar. Þar með flokkast eggjakast í Alþingishúsið sem ofbeldi. Þætti þér það ekki ofbeldi gegn þér og þínum ef húsið þitt eða bíllinn, skólataskan eða skórnir væru ataðar eggjum?

Georg, þakka þér fyrir gott innlegg, sérstaklega tek ég undir orð þín um að það verði að gæta þess að gefa lögreglunni ekki tilefni til að mæta með óeirðasveitina á Austurvöll næsta laugardag.

[Ingibjörg Hinriksdóttir, 9.11.2008 kl. 14:04]

Sæll Ævar, auðvitað voru margfallt fleiri en 500 á Austurvelli. Þetta var fjölmiðlaháð hjá mér.

[Þorsteinn Ingimarsson (IP-tala skráð) 9.11.2008 kl. 14:33]

Sæl Ingó, flott að þú komst niður á Austurvöll og vona þú komir aftur um næstu helgi. Ég hef sjálfur mætt alla daganna og held því áfram. Sakna þess að hafa ekki séð félaga þarna hingað til. Held að þeir hafi ekki verið nema örfáir.

Varðandi eggjakastið og mótmæli við alþingishúsið er ég á annarri skoðun.  Fylgdizt með þeim álengdar eftir fundinn, en ég er ekki tilbúinn að standa  hjá og horfa á þegar/ef óeirðalöggan mætir á svæðið til að berja á unga fólkinu okkar.

Það er engin tilviljun að björn tilkynnti um ráðningu 250 nýrra lögreglumanna sem eiga að vera tiltækir þegar kallið kemur.

[Ingibjörg Hinriksdóttir, 9.11.2008 kl. 14:51]

Steini, þú misskilur mig alveg. Ég myndi sannarlega ekki standa þegjandi hjá ef óeirðalöggan kæmi til að berja á unga fólkinu. Það sem ég er að benda á er að ég vil koma í veg fyrir það að óeirðalöggan þurfi að blanda sér í málin. Það segir sig sjálft, að sá sem klifrar uppá þak Alþingishússins og dregur þar Bónusfána að húni má eiga von á því að fá móttökur frá lögreglunni þegar hann kemur niður aftur.

Mín skoðun er að það þurfi að koma í veg fyrir að mótmælin breytist úr friðsömum mótmælum yfir í mótmæli þar sem mótmælendum lendir saman við lögregluna og að skemmdir verði á eignum fólks eða ríkisins og jafnvel að líkamstjón verði á fólki. Það þarf því að stoppa eggjakastið í fæðingu. Beinum reiði okkar í annan farveg, hitt getur aldrei leitt neitt gott af sér.

[Þorsteinn Ingimarsson (IP-tala skráð) 9.11.2008 kl. 15:01]

við erum sammála um að löggunni frá. annars hef ég alltaf taugar til anarkisma og fannst fánagjörningurinn snilld.

Annars þarf flokkurinn okkar að taka sig saman í andlitinu ef ekki á illa að fara. skil t.d ekki að eftirlaunafrumvarpið hræðilega komizt ekki á dagskrá. ég vil nöfnin á þeim opinber sem standa gegn afnáminu og þeir svari fyrir það í næstu kosningum sem verði vonandi ekki seinna en í feb.

[Ingibjörg Hinriksdóttir, 9.11.2008 kl. 15:13]

Ég hef einmitt verið að hugsa þetta með flokkinn okkar. Sjá athugasemd mína við bloggið hjá Hreini Hreins. Leiðin út úr þessum vanda okkar er hins vegar ekki ein og hún er alls ekki greið. Hún er mikið heldur bæði grýtt og torræð og það er ekki hægt að setja inn punkt í tugþúsundir gps-tækja landsmanna til að vita hvert halda skal. Þangað til bera fæst orð minnsta ábyrgð. Ábyrgð er hins vegar það sem ég er að hugsa um núna og mun sjálfsagt setja á prent áður en langt um líður.

[Lilja Guðrún Þorvaldsdóttir, 10.11.2008 kl. 22:17]

Ég vona bara að fólksfjöldinn sem mætir á Austurvöll tvöfaldist næsta laugardag, og ríkisstjórnin fari að hlusta á fólkið í landinu. - Auðvitað verða kosningar fljótlega svona apríl-maí.

Og kannski fyrr ef þeir gera ekki nýjan stjórnarsáttmála í þessari viku.