Afgreiðslan má ekki dragast lengur

Í gær lýsti ég þeirri skoðun minni að þolinmæði mín væri ekki endalaus. Endir þolinmæðinnar nálgaðist óþægilega mikið í morgun þegar forsíður dagblaðanna í eigu Árvakurs blöstu við. Seðlabankinn á leið í gjaldþrot ef ekki tekst að fá meiri og betri tryggingar fyrir 350 milljarða króna útistandandi skuldum. Ég hef í morgun spurt mig að því af hverju bankinn fór ekki fram á þessar tryggingar miklu, miklu fyrr. Hafa herrarnir í svarta kassanum við Kalkofnsveg ekki gert neitt annað en að naga blýanta, eins og lýst var fyrir margt löngu?

Hin vaxandi bræði mín leitar ótt og títt til forsætisráðherra Íslands mörg undanfarin ár og núverandi seðlabankastjóra. Um það ætti enginn að velkjast í vafa um. Bræði mín beinist líka að stjórnmálaflokki sem nú fer undan í flæmingi og ber við minnisleysi líku því sem fyrrverandi formaður flokksins nýtti sér svo vel fyrir nokkrum árum. Miðað við baksíðufrétt á öðru Árvakurs-blaðinu í dag þá virðast þingmenn flokksins líka vera farnir að huga að landflótta því a.m.k. einn þeirra æfir nú sjósund af miklu kappi. Reyndar fer sá þingmaður og fyrrum ráðherra ekki sérlega leynt með þessar æfingar sínar því maður veltir því óneitanlega fyrir sér hvernig Árvakurs-blaðinu tókst að vera í Nauthólsvík akkúrat þegar þingmaðurinn kom að landi. Eina skýringin er sú að þingmaðurinn hafi sjálfur hringt í Árvakur til að tilkynna um sundæfinguna. Það er gott að vita að þingmaðurinn hafi stöðugan og óþreytandi áhuga á að koma sjálfum sér á framfæri á þeim tímum sem nú eru uppi. Ég minnist þess a.m.k. ekki að þingmaðurinn hafi tjáð sig með einu einasta orði um efnahagsástandið og sína ábyrgð á því.

Umleitanir um lán frá IMF hafa tekið óralangan tíma, alltof langan að mínu viti, það hlýtur a.m.k. að liggja fyrir hvort sjóðurinn ætli að lána okkur pening eða ekki. Ef ekki þá væri bara fínt að fá að vita það strax svo við Íslendingar getum búið okkur undir harðan og langan vetur. Góðu fréttir dagsins voru af síldveiði í Breiðafirði og sigri Arsenal í meistaradeildinni. Sem viðbrögð við kreppunni hef ég tekið ákvörðun um að ljúka áskriftartíma mínum hjá Stöð2Sport og ég reyni að nýta hverja mínútu sem gefst til að ofskammta mér íþróttir áður en áskriftin rennur út.

Athugasemdir

[haraldurhar, 21.10.2008 kl. 23:30]

Sæl. Ingibjörg. +

   Gleymdu því ekki að stjórn og stjórnendur Seðlabankans sitja í embættum sínum með fulltingi þíns flokks. Samfylkingin ætlar að feta algjörlega í fótspor Framsóknarfl. og láta nota sig sem hækju af íhaldinu.

[Helgi Jóhann Hauksson, 22.10.2008 kl. 04:55]

Ætli óvænt gjaldþrota staða Seðlabankans hafi ekki sett strik í IMF-reikninginn. Það munar um það ef seðlabankinn er að tapa 350 milljörðum án þess að hafa vitað af því fyrr en sérfræðingar IMF bentu bankanum á það ef marka má frétt Fréttablaðsins. Og bankinn á fyrir aðeins eigið fé uppá 91 milljarð.

Fjárlög alls íslenska ríkisins eru uppá 500 milljarða eins og þau liggja nú fyrir þinginu svo 350 milljarðar ofaná allt annað er peningur sem munar um.

[Björn Hróarsson (IP-tala skráð) 22.10.2008 kl. 05:29]

Grunnskýringin á öllum þessum vanda er ofur-einföld. Það eru of margir búnir að kjósa Sjálfstæðisflokkinn of oft. Flóknara er það nú ekki.

[Kristján Þór Gunnarsson, 23.10.2008 kl. 21:02]

Sagði einnig upp Stöð 2 sport og Mogganum :-)

Kannski verður þetta bráðum eins og í " den " fáum enska boltann á RUV viku eftir að leik lauk :-)

Á báðum stöðum spurður hver væri ástæðan :-) !

Spurði á móti hvort viðkomandi hefði verið að koma úr langri utanlandsferð þ.s. ekkert samband hefði verið við umheiminn.

[Ingibjörg Hinriksdóttir, 23.10.2008 kl. 21:50]

Góður Krissi! Moggann get ég lesið í vinnunni, Stöð 2 heillar mig ekki og hefur aldrei gert, svo er stutt út á næsta bar til að horfa á enska þegar svo ber undir. Auk þess eru náttúrulega útsendingar í tengslum við tippið okkar í Smáranum. Frábært að eyða 90 mínútum í góðum félagsskap.