Danskir dagar

Um helgina skrapp ég vestur í Stykkishólm og tók þátt í dönskum dögum. Talsverðar fréttir hafa verið frá hátíðinni og flestar þeirra hafa verið neikvæðar. Er það miður, því mín upplifun af hátíðinni er sú að þar hafi flest farið vel fram og skv. því sem ég átti von á.

Það verður þó ekki framhjá því litið að nokkur unglingadrykkja var á svæðinu, heldur meiri en hún hefur verið þau tvö skipti sem ég hef áður sótt hátíðina. Ástæðan er bæði sú sem framkvæmdastjóri hátíðarinnar benti á, þ.e. að hátíðin væri ekki um sömu helgi og menningarnótt, og hitt að skólar hefjast nú fyrr en þeir gerðu þegar ég sótti hátíðina síðast heim og e.t.v. voru unglingarnir að nota þessa síðustu helgi fyrir vetrarannir til að skvetta úr klaufunum.

Mér þótti ákaflega miður að verða vitni að þessari unglingadrykkju, en þó verður að segjast eins og er að hinir fullorðnu voru ekki endilega betri en unglingarnir hvað það varðar. Það breytti þó ekki því að ég skemmti mér vel, bæði á föstudag og laugardag og var stórglæsileg flugeldasýningin frá Súgandisey hátindur hátíðahaldanna.

Það er virkilega skemmtilegt að fylgjast með því hvað sveitarfélög um land allt leggja mikinn metnað í hátíðir sem þessa. Reyndar væri það fróðlegt að taka það saman hvaða sveitarfélög efna til bæjarhátíða yfir sumartímann. Þær eru örugglega fleiri en maður heldur.

Hólmurum þakka ég fyrir helgina og hlýjar móttökur.

Athugasemdir

[Helga Kristjánsdóttir, 18.8.2008 kl. 00:37]

Kíkti inn hjá þér,er að bíða eftir handboltanum,þó ég eigi að mæta kl. 8,30 í fyrramálið. kveðja.

[Lilja Guðrún Þorvaldsdóttir, 18.8.2008 kl. 00:55]

Það er nefnilega það að afþví læra börnin að fyrir þeim er haft.