Hóteldvöl í höfuðborginni

U19 ára stúlknalandsliðið fór inná hótel í dag.  Flestar stelpurnar eru héðan af höfuðborgarsvæðinu og eiga ekki nema um 10-15 mínútna akstur heim til sín úr Vatnsmýrinni. Það á reyndar líka við um þá fylgdarsveina sem eru með liðinu, sjálfa mig þar með talda.

Það er óneitanlega dálítið undarlegt að þvælast um í rútubíl frá hóteli á æfingu og að liggja andvaka á hótelherbergi þegar rúmið manns er aðeins í 10 mínútna fjarlægð. En svona er þetta og það er spenningur í hópnum fyrir komandi móti. Úrslitakeppni Evrópumóts stúlknalandsliða yngri en 19 ára.

Í dag hef ég hitt marga gamla kunningja úr boltanum, s.s. fararstjórnir danska, norska og enska liðsins, auk nokkurra kunnuglegra andlita frá Frakklandi og Þýskalandi. Það er alltaf gaman að hitta þetta fólk sem hefur brennandi áhuga á knattspyrnu og vill leggja ótrúlegustu hluti á sig til að efla kvennaknattspyrnuna í sínu heimalandi. Í gegnum tíðina hef ég lært mikið af þessu fólki og vona sannarlega að mér hafi tekist að smita einhverju til þeirra héðan ofan af Íslandi.

Fyrsti leikur íslenska liðsins er á miðvikudag, en þá tökum við á móti Norðmönnum í opnunarleik mótsins á Laugardalsvelli kl. 19:15.  Enn og aftur hvet ég alla þá sem vettlingi geta valdið til að mæta á völlinn, það er ókeypis inná alla leiki í boði Orkuveitu Reykjavíkur!