Kostnaður Kópavogsbæjar við Kórinn á fjórða milljarð

Á fundi bæjarstjórnar Kópavogs í gær lá fyrir fundinum svar framkvæmda- og tæknisviðs um kostnað við byggingu knattspyrnuhallarinnar Kórsins, þ.e. þann hluta sem Kópavogsbær hefur átt frá upphafi.

Hér er rétt að taka það strax fram að um er að ræða knatthúsið sjálft og búningsklefa en ekki íþróttahúsið og sundlaugina sem búið er að byggja við húsið.

Samkvæmt upplýsingum frá framkvæmda- og tæknisviði er kostnaður bæjarins fram til dagsins í dag:

• Kórinn, knatthús 1.705.128.986
• Íþróttavellir við Kórinn, 187.345.582

Þessar tölur sem hér eru hafa verið skv. mínum upplýsingum uppreiknaðar til dagsins í dag en bygging hússins hófst að mig minnir á árinu 2005 eða 2006.

Nú er fyrirliggjandi samningur milli Knattspyrnuakademíu Íslands og Kópavogsbæjar um að kaupa íþróttahúsið, sundlaugina, móttökuna, veitingaaðstöðuna og stækkun veitingastaðarins á svæðinu fyrir samtals 1.650.000.000 krónur. Áhvílandi á þessum eignum eru veðbönd að fjárhæð 820.000.000 króna.

Samtals gerir þetta kostnað uppá 3.542.474.568 krónur eða rúmlega þrjá og hálfan milljarð króna.

Eftir á að hyggja hefði örugglega mátt ráðstafa skattpeningum Kópavogsbúa betur en í þetta verkefni en við verðum að sættast við húsið og það sem þar er og sameinast um að finna því sem mest gagn til framtíðar.

 

Athugasemdir

[Helga Kristjánsdóttir, 25.3.2010 kl. 00:25]

Oft er það svo kostnaðarsöm mannvirki,reynast ómissandi,þegar fram liða stundir og er þá hægt að þakka fyrir framtakssemina.

[Ingibjörg Hinriksdóttir, 25.3.2010 kl. 15:23]

Sæl Helga,

ég vona sannarlega að mannvirkið verði notað sem allra mest á komandi árum og áratugum.

[Magnús Helgi Björgvinsson, 25.3.2010 kl. 22:27]

Helga ætli það sé nú ekki verið að tala um að mannvirkið var hluti af einhverjum draumheimum um Íþróttaakademíu eða Knattspyrnuakademíu þar sem Kópavogur er nú lentur í því að kaupa upp mannvirki sem aðrir áttu að eiga og kosta upp á milljarða. Sem og að þetta knattspyrnuakademíudæmi og skóli virðist hafa floppað. Sem og draumar um að opinberir landsleikir gætu farið þar fram þ.e. í Kórnum reyndust ekki standasta nema varðandi óopinbera æfingaleikir þar sem ekki fæst samþykkt fyrir landsleikjum í alþjóðakeppnum í þessu húsi.

Gunnar vinur þinn var ekki alltaf mikið fyrir að kanna málin. Það var bara rokið í hlutina án þess að vera búinn að rannsakamálin til fulls.