63% fjarverandi þingmanna úr minnihlutaflokkum við atkvæðagreiðslu í morgun

Ætli það séu ekki einhverjir sem telji að ég sé stórskrítin að kvelja sjálfa mig við það að hlusta (og jafnvel horfa) á útsendingu frá Alþingi, nú nokkrum dögum fyrir áramót. Ástæða þess að ég ákvað að setja sjálfa mig í þessa stöðu er að fyrir þinginu liggur að ganga frá svokölluðu Icesave samkomulagi, eða lögum þar um.

Einhvern grun hafði ég um það í morgun að umræður við upphaf kjörfundar yrðu fjörugar í dag. Jólasteikin hefur greinilega farið vel í þingmenn því menn höfðu uppi mörg stór orð í upphafi fundar og skildu ekkert í því að það væri möguleiki á löngum fundi í dag og könnuðust ekkert við samkomulag þar um. Einn þingmaður, sem ég hygg að sé nýkjörinn þingmaður utan flokka Birgitta Jónsdóttir, hefur þann leiða sið að hrópa húrra eða jafnvel púa á þingmenn í ræðustól. Hún lét ekki sitt eftir liggja í dag.

Þingmenn greiddu atkvæði um hvort það ætti að hafa kvöldfund í kvöld, 30 sögðu já 24 sögðu nei. Það var því ekki tilviljun að ég velti því fyrir mér hvar þingmenn minnihlutans voru við upphaf þingfundar í dag? Meirihluti er skipaður 34 þingmönnum Samfylkingar og Vinstri grænna og þar af leiðandi 29 þingmanna minnihlutaflokkanna. Samkvæmt fjarvistarskrá á vef Alþingis er ljóst að Álfheiður Ingadóttir var fjarverandi á fundinum og því hefði átt að greiða 62 atkvæði um kvöldfundinn. Hvar voru 3 þingmenn meirihlutans og ekki síður hvar voru 5 þingmenn minnihlutans, þingmenn sem hafa lagt sig fram um það dag og nótt að tefja afgreiðslu Icesave laganna? Hafa þessir 5 þingmenn gefist upp, eða hafa þeir ekki áhuga lengur á því að mæta í vinnuna sína?

Mér finnst það mjög alvarlegt ef það vantar 8 af 62 þingmönnum (gleymum því ekki að einn þingmaður var á fjarvistarskrá) eða nærri 13% þeirra sem hafa verið kjörnir til þess að setja íslenskri þjóð lög og reglur. Af þessum 8 eru nærri 63% úr minnihlutaflokkunum.

Sussss, mætið í vinnuna gott fólk!