Afmælisboð hjá ungri og eldri

Því miður komst ég ekki á útifundinn í gær. Var upptekin í 5 ára afmæli Sigrúnar Birtu Gunnarsdóttur, sem söng svo fallega fyrir mig á afmælisdaginn minn í fyrra. Svo fór ég í 60 ára afmæli stórvinar míns Halldórs B. Jónssonar, fv. varaformanns Knattspyrnusambands Íslands. Halldór hætti óvænt í stjórn KSÍ í fyrra vegna veikinda og mér þótti vænt um að hann var gerður að heiðursfélaga knattspyrnusambandsins á 60 ára afmælinu. Hann á það svo sannarlega skilið fyrir ómetanleg og ómælanlegt framlag til knattspyrnu á Íslandi.

En þó ég hafi ekki náð í útifundinn þá náði ég að hlusta á síðustu mínúturnar í ávarpi Gerðar Kristnýjar og var ég einstaklega ánægð með það sem hún sagði. Ég er sko ekkert franskbrauð heldur alvöru íslenskt rúgbrauð.

Þegar ég komst heim úr afmælisboðunum þá tók ég mig til og hrærði í jólalifrarkæfuna sem ég ætla að bera fram á jólafundi kvennanefnda KSÍ nk. föstudag. Ég held og vona að lifrarkæfan hafi heppnast vel en ég ætla ekki að baka hana fyrr en eftir vinnu á föstudag svo það verði enn ylur í henni þegar ég mæti í jólaboðið.

Einhverjum bloggvina minna hefur verið tíðrætt um jólagjafir og jólaskraut. Það upplýsist hér með að jólagjafir eru í húsi og jólaskraut sömuleiðis. Það má samt alltaf bæta um betur og hver veit nema það bætist við ein eða tvær gjafir fyrir aðfangadag og jafnvel eitt eða annað skraut í húsið.

Athugasemdir

[Helga Kristjánsdóttir, 7.12.2008 kl. 01:11]

Var að enda við að svara þér á blogginu mínu þar sem ég tel upp flest af því sem ég veit þú brallar í sjálfboðavinnu,gleymdi fótboltanum sem þú sinnir af kostgæfni(já mér er alveg sama þótt ég smjaðri,fyrir verðandi íþróttamálaráðherra).Halldór B. Jónsson? K.R.?

[Jenný Anna Baldursdóttir, 9.12.2008 kl. 00:02]

Vá hvað þú ert dugleg.  Allt komið á hreint?  Jösses, ég er ekki byrjuð að versla jólagjafir.