Fló á skinni

Síðastliðið föstudagskvöld fór ég á leikritið Fló á skinni í uppfærslu Leikfélags Akureyrar ásamt systrum mínum, mágum og foreldrum. Núverandi leihússtjóri Borgarleikhússins og fyrrverandi leikhússtjóri LA flutti sýninguna suður og gengur hún nú í höfuðstaðnum fyrir fullu húsi um hverja helgi. Miðað við upplifun mína af leikritinu þá er það engin furða.

Árið 1972 setti Leikfélag Reykjavíkur verkið upp og þá fóru foreldrar mínir ásamt okkur systrum á verkið. Ég man enn eftir því hvað okkur þótti verkið skemmtilegt, Þorsteinn Erlingsson lék holgóma manninn (að mig minnir) og fór hann alveg á kostum. Við systur hermdum eftir honum í margar vikur á eftir. Í minningunni var hraðinn í verkinu árið 1972 ekki alveg eins mikill og er í því í dag en að þessu sinni er það í nýrri þýðingu Gísla Rúnars Jónssonar en þýðingin frá 1972 var í höndum Vigdísar Finnbogadóttur.

Á laugardagskvöld fóru síðan systkinabörn mín og tengdabörn í leikhúsið 8 saman og skemmtu sér konunglega. Það er því engu logið þegar sagt er að verkið brúi kynslóðabil margra kynslóða.

Ég hvet alla sem hafa vott af húmor til þess að fara á þessa sýningu. Hún er stórfengleg. Guðjón Davíð Karlsson fer á kostum í hlutverkum sínum og það sama má segja um alla aðra leikara sem voru hver öðrum betri. Þýðing Gísla Rúnars er mögnuð eins og við var að búast, staðfærð og skemmtileg, þó örlaði á því hjá mér í leikhúsinu að það hefði verið hægt að staðfæra verkið uppá nýtt miðað við nýtt leikhús. Flytja verkið allt suður yfir heiðar!

Leikfélagi Akureyrar, Maríu Sigurðardóttur leikstjóra og öllum þeim sem að verkinu koma óska ég til hamingju með stórkostlega fyndið og skemmtilegt verk.

Athugasemdir

[Marta B Helgadóttir, 15.9.2008 kl. 23:11]

Takk fyrir þessa ábendingu. Það væri gaman að sjá þessa sýningu. Mig minnir að ég hafi séð þetta leikrit með foreldrum mínum þegar ég var krakki