Kópavogur er bærinn minn

Það hefur mikið gengið á í Kópavogi, bænum mínum, undanfarna daga. Alla síðustu viku dundu á okkur íbúunum allskyns áróður frá frambjóðendum eins stjórnmálaflokks í bænum þar sem þeir lofuðu bót og betrun ef þeir fengju bara atkvæðið mitt - eða þitt. Milljónum á milljónum króna ofan var eytt í baráttuna og var mér hreinlega nóg um, það er greinilega ekki kreppa þar á bæ. Svo rann upp laugardagurinn, kosningin fór fram og um kvöldið birtust niðurstöður.

Það var ekki mitt að hvetja fólk til að taka þátt í þessu prófkjöri og þó ég sé ögn óttaslegin yfir þeim mikla fjölda sem tók þátt þá er ég í aðra röndina ákaflega ánægð og stolt af öllum þeim sem tóku þátt. Í prófkjörinu kom þó fram skýr og afgerandi vilji bæjarbúa til breytinga. Og það urðu breytingar.

Eftirmáli prófkjörsins er óljós og ég bíð þess rétt eins og aðrir Kópavogsbúar hvað verður. En hótanir um endurkomur og ásakanir um svindl og svínarí munu ekki nýtast Kópavogsbúum. Undanfarna átta mánuði hefur ríkt sérstaklega góð eining innan bæjarstjórnar Kópavogs. Nú lítur út fyrir að enn á ný verði alið á tortryggni, farið verður í feluleiki, lagst í skotgrafir og hafin upp gífuryrði og ásakanir. Sjálf kvíði ég því ekki að takast á við það en ég þykist vita að það er ekki sérstök eftirvænting á bæjarskrifstofunum. Starfsmenn þar eiga samúð mína alla.  

Athugasemdir

[Eygló, 23.2.2010 kl. 02:51]

Æi, það er svo illa farið með fv. bæjarstjóra; hann hefur verið rægður, uppnefndur og lagður í einelti, - grey karlinn og hann sem var svo slæmur í hnjánum.

[Sigurður Þorsteinsson, 23.2.2010 kl. 19:53]

Sæl Ingibjörg

Þú áttir víst eftir að fjalla um siðferðisbrot bæjarfulltrúa Samfylkingarinnar á þessu kjörtímabili hér á blogginu.