Engin geimvísindi

Gunnsteinn Sigurðsson, bæjarstjóri í Kópavogi, sendi heldur óvænt að ég tel frá sér yfirlýsingu í kvöld þess efnis að hann hyggi ekki á framboð til bæjarstjórnar í Kópavogi nú í vor. Ég hef verið í ágætri stöðu til þess að fylgjast með flokkadráttum í Kópavogi bæði innan Samfylkingar, þar sem ég starfa, sem og innan annarra flokka sem eiga fulltrúa í bæjarstjórn. Það hefur sjálfsagt ekki farið framhjá neinum að óróleikinn í Sjálfstæðisflokknum hefur verið mikill og megnið af þeim væringum sem þar hafa átt sér stað hafa snúist um fyrrverandi bæjarstjóra, hinn brottvikna Gunnar I. Birgisson.

Gunnar er stór maður að öllu leyti en líkt og líkamlegt ástand hans hefur dregist saman á undanförnum vikum hefur líka minnkað álit margra á honum sem stjórnmálamanni og svei mér ef það hefur ekki líka dregið nokkuð úr styrk hans innan flokks og utan. Hann sér hins vegar enn stórt og mikið ljón þegar hann lítur í spegilinn það sást vel í Morgunblaðinu í gær þar sem hann fór hörðum orðum um þá sem nú sitja í bæjarstjórn Kópavogs. Eins og hans er von og vísa, fór hann víða, hann eirði engum og hjó víða.

Gunnsteinn Sigurðsson er heiðarlegur maður og sanngjarn þó ég sé fjarri því alltaf sammála skoðunum hans á hinum ýmsu málum. Yfirlýsingin sem hann sendi frá sér í dag lauk með orðunum: "Ég styð Sjálfstæðisflokkinn og óska þess að kjósendur beri gæfu til að kjósa heiðarlegt og duglegt fólk á framboðslistann sem hefur hugsjónir flokksins og heill bæjarbúa að leiðarljósi í hvívetna."

Ég tel að ekki þurfi nein geimvísindi til að átta sig á því að þarna skýtur Gunnsteinn föstum skotum á Gunnar og hans fylgifiska sem sannarlega hafa sig mikið í frammi innan SjálfstæðisFLokksins í Kópavogi. Eins og við var að búast þá skildi Gunnar sneiðina, var ekki lengi að grípa til varna og heldur því fram að hann hafi ekki komið nálægt bæjarpólitíkinni í Kópavogi síðasta hálfa árið!

Ég veit að lesendum Morgunblaðisins hefur fækkað mikið undanfarið en sjálfsagt hafa einhverjir aðgang að blaðinu t.d. í vinnunni eins og ég. Afskipti Gunnars af bæjarpólitíkinni hafa opinberlega verið minni eftir að hann hröklaðist úr stóli bæjarstjóra en hann er sannarlega kominn í stuð ef eitthvað er að marka grein sem hann skrifar í flokksblaðið sl. miðvikudag. Þar fer hann mikinn og gagnrýnir fjárhagsáætlun bæjarins fyrir árið 2010 og skýtur mjög ómaklega á núverandi bæjarstjóra. Ég vona bara að Gunnsteinn stigi skrefið til fulls og segi skilið við þennan hóp fólks sem kennir sig við sjálfstæði og fari að vinna eftir sannfæringu sinni en ekki sannfæringu annarra, allra síst fv. bæjarstjóra sem fer vægast sagt með ósannindi þegar hann segist ekki hafa komið nálægt bæjarpólitíkinni sl. mánuði!