Sækjast sér um líkir

Seint hefði ég trúað því á mig að vitna í orð Björns Bjarnasonar dómsmálaráðherra en ætla að gera það engu að síður. Á bloggi sínu í dag skammast hann út í Pál Magnússon, bæjarritara og formannsefni Framsóknarflokksins og segir:

Nú fimm árum síðar virðast forystumenn í Samfylkingu og Framsóknarflokki enn vera komnir í hár saman vegna Evrópumála og enn bíða þeir eftir því, hvað Sjálfstæðisflokkurinn segir. Páll Magnússon segir, að hafi Framsóknarflokkurinn verið „hækja“ Sjálfstæðisflokksins í ríkisstjórn sé Samfylkingin „skækja“ Sjálfstæðisflokksins í núverandi ríkisstjórn.

Þetta orðbragð Páls er líklega til marks um nýja tíma í stjórnmálum. Ég tel það ekki til neinna bóta og ekki auðvelda neinum að gera upp hug sinn.

Það er helst næst síðasta setning Björns sem vekur mig til umhugsunar. Manni sem starfar í skjóli bæjarstjórans í Kópavogi er vorkunn, bregði hann fyrir sig orðbragði sem þessu. Slíkt er alkunna í bæjarstjórn Kópavogs og fer þar bæjarstjórinn jafnan fremstur meðal jafningja. Oft hefur verið sagt að menn smitist af því umhverfi sem þeir starfa í og þeim háttum sem þar eru hafðir í hávegum. Orðbragð Páls Magnússonar í garð Samfylkingarinnar kemur mér því engan veginn á óvart. Björn Bjarnason ætti kannski frekar að beina umvöndunum sínum til yfirboðara Páls í Kópavogi og biðja hann um að gæta orða sinna. Það er þaðan sem Páll fær munnsöfnuðinn og sjálfsagt kannast hann vel við það að vera skækja eða hækja Sjálfstæðisflokksins, þann starfa hafa Páll og félagar hans í Framsóknarflokknum í Kópavogi haft frá árinu 1990.

Athugasemdir

[Gudrún Hauksdótttir, 28.12.2008 kl. 08:59]

Tjái mig ekki um tessi mál ....Gledilega rest til ykkar

hjartanskvedja frá Jyderup

[Ingibjörg Hinriksdóttir, 28.12.2008 kl. 10:51]

Takk fyrir athugasemdirnar bæði tvö. Vinkona mín hafði á orði við mig að vændi væri bannað og því ætti Páll ekki að tala um Samfylkinguna sem skækju. Jú sjáðu til ... Páll og yfirboðari hans í Kópavogi vilja ekki banna nektardans (sem er ekki sérlega langt frá vændi) í Kópavogi, eða ... þeir amast ekki mikið við því að dansinn fari fram bakvið lokuð gluggatjöld!

[Kristján Þór Gunnarsson, 28.12.2008 kl. 20:37]

Orð Páls koma svolítið á óvart og eru ekkert annað en klaufaleg aðferð til að skapa sér einhverja stöðu fyrir komandi formannsslag. Erfitt er að sjá að þessi ummæli verði honum til framdráttar.

Björn Bjarnason hefur undanfarin ár verið " grumpy old man " og orð hans falla í þann flokk. Brátt verður honum skipt út og þá getur hann gengið í flokk með Styrmi og félögum.