Margrét Lára íþróttamaður ársins 2007

Í kvöld var Margrét Lára Viðarsdóttir útnefnd íþróttamaður ársins 2007. Þetta er sannarlega mikill heiður fyrir þessa frábæru knattspyrnukonu sem hefur nú unnið flesta ef ekki alla titla sem hægt er að vinna í íslenskri knattspyrnu. Margrét Lára átti gott sumar í sumar. Hún bætti sitt eigið markamet, varð Íslandsmeistari með liði sínu Val og var lykilleikmaður íslenska landsliðsins eins og svo oft áður. Á æfingamóti á Algarve í vor bætti hún markamet landsliðsins og hefur nú skorað 29 mörk í 35 landsleikjum.

Útnefningin í kvöld er ekki aðeins heiður fyrir Margéti Láru heldur og fyrir íslenska kvennaknattspyrnu sem hefur farið stigvaxandi á undanförnum árum og þá ekki síst fyrir tilstilli kraftaverkakonunnar Margrétar Láru Viðarsdóttur. Ég óska Margréti Láru og hennar fólki öllu innilega til hamingju með titilinn, þetta var verðskuldað.

Athugasemdir

[Vilhjálmur Óli Valsson, 30.12.2007 kl. 03:04]

Loksins, loksins var íþróttapersóna valin sem á það skilið. Ég er stoltur af þeim íþróttafréttaMÖNNUM okkar sem kusu á þennan veginn!! Burtséð frá því er gerðist í haust þá er þetta sú niðurstaða sem réttust er. Til hamingju Margrét Lára og þið hinar fótboltastelpurnar.

[Ingibjörg Hinriksdóttir, 30.12.2007 kl. 10:52]

Sæll Vilhjálmur,

jú auðvitað getur maður verið stoltur af þeim mönnum sem kusu íþróttamann ársins. Ég er þó miklu stoltari af Margréti Láru og íslenskum knattspyrnukonum sem unnu besta afrek Íslands á árinu 2007 er þær lögðu Frakka á Laugardalsvelli.

En við vitum við að konur eru líka menn og að íþróttafréttamenn fjalla um bæði konur og KARLA í íþróttum. En ég þykist þó vita að þú sért að vísa til þess að í Samtökum íþróttafréttamanna séu nær eingöngu karlar þá bendi ég á að í samtökunum er nú ein kona, Lilja Björk Hauksdóttir, fréttamaður á RÚV. Það er líka framför.

En varðandi umræðunni um skiptingu kjörsins upp í íþróttakarl og íþróttakonu ársins, þá hef ég persónulega verið algjörlega á móti því. Um það hef ég skrifað í grein sem ég birti á heimasíðu minni, www.ingibjorg.net, og fjallar um kjör íþróttakonu og -karls ársins í Kópavogi. Bein slóð á þá síðu er http://www.ingibjorg.net/frettir-og-pistlar/nr/254/ 

Góðar stundir.

[Ingibjörg Hinriksdóttir, 30.12.2007 kl. 10:55]

Og Villi ... gaman að heyra frá þér!  ... Ingó.